Eitt stærsta matvæla­fyrirtæki Noregs framleiðir og selur skyr með sérleyfi frá MS

Morten Mitchell Larød

Norðmenn fá nú að kynnast skyri en sala á því er hafin í fjórum helstu stórmarkaðskeðjum Noregs.

Q-meieriene sem eru í eigu Kavli í Noregi hófu í gær framleiðslu og sölu á skyri í Noregi í samstarfi við Mjólkursamsöluna, sem fær ágóðahlut af sölunni, að því er fram kemur í tilkynningu Mjólkursamsölunnar. „Skyrið er selt í fjórum helstu stórmarkaðskeðjum Noregs. Framleiðslutæknin er sú sama og hjá MS en mjólkurfræðingar frá MS Selfossi eru til aðstoðar nú við upphaf framleiðslunnar.

Í fyrstu er um að ræða 3 bragðtegundir sem voru þróaðar fyrir norska markaðinn, þ.e. skógarber & vanilla, hindber & granatepli og jarðarber & granatepli. Skyrið er í 160 gr.dósum og aðal markhópurinn eru konur á aldrinum 20 til 50 ára. Skyrið er selt sem sérstök gæðavara og dósin kostar um 300 íslenskar krónur.

Q-meieriene ætla sér stóra hluti með þessa vöru í Noregi og hafa lagt mikið undir í markaðssetningunni en áformað er að verja sem nemur um 200 milljónum íslenskra króna á ári í markaðssetningu á skyrvörum næstu 3 árin. Skyrið er framleitt í Gausdal mjólkurbúinu sem er rétt fyrir utan Lillehammer.

Íslendingar neyta um 2.000 tonna af bragðbættu skyri á ári en það er svipað magn og Norðmenn vonast til að selja næsta árið í kjölfar kynningar þar ytra.

Á heimasíðu Q- meieriene (www.q-meieriene.no) segir m.a. að nú loksins megi finna Skyr í mjólkurhillum norskra verslana. Skyrið sé létt og próteinrík millimáltíð sem sé uppruninn frá Íslandi en þar borði neytendur meira af þessari sér íslensku afurð en af jógúrt.

Mjólkursamsalan gerði samning við Q-meierier um sérleyfisvinnslu þeirra á skyri en samningurinn nær einnig til víðtækari samstarfsverkefna á sviði matvælaframleiðslu við móðurfélagið Kavli, sem er einn stærsti matvælaframleiðandi Norges. Þar er um að ræða ný viðskiptaþróunarverkefni, samvinnu í tæknihagræðingu og sameiginlegum innkaupum.

Kavli var stofnað 1893, þegar bóndasonurinn Olav Kavli fékk réttindi til að stofna sjálfstætt matvælafyrirtæki í Bergen. Sonur hans Knut Kavli vildi að fyrirtækið yrði í samfélagslegr eigu og í því skyni stofnaði hann sjálfseignastofnun, Kavli sjóðinn árið 1962. Kavlisjóðurinn er eigandi Kavli fyrirtækisins í dag. Nú selur Kavli mat- og drykkjarvörur í yfir tuttugu löndum og er með eigin framleiðslustöðvar í Noregi og Svíþjóð,“ segir enn fremur í tilkynningu MS.