Útlendingar eiga enn um 180 milljarða í ríkis­bréfum og -víxlum

Ed

Útlendingar eiga enn um 180 milljarða að nafnvirði í ríkisbréfum og ríkisvíxlum.

Eign útlendinga í ríkisverðbréfum minnkaði talsvert í júní en þeir eiga þó enn um það bil 180 ma.kr. að nafnvirði í ríkisbréfum og -víxlum, að því er greint er frá í Morgunkorni Íslandsbanka.

Þar segir enn fremur:

„Vaxtagreiðslur ríkissjóðs til erlendra fjárfesta eru því enn verulegar. Í Markaðsupplýsingum Seðlabankans fyrir lánamál ríkisins, sem út komu í gær, kemur fram að erlendir fjárfestar keyptu fimmtung seldra bréfa í fyrsta útboði á ríkisbréfaflokknum RIKB 25 0612, alls ríflega 2 ma.kr. að nafnverði. Teljum við ótvírætt jákvætt að útlendingar skuli hafa áhuga á íslenskum langtíma ríkisbréfum, þótt enn sem komið er sé ekki um háar fjárhæðir að ræða. Raunar er athyglisvert að stærsti kaupendahópur þessara bréfa voru innlendir lífeyrissjóðir sem keyptu 23% þeirra, en hlutdeild lífeyrissjóðanna í öðrum ríkisbréfaflokkum er að jafnaði um 7%. Langur líftími hins nýja flokks ætti hins vegar að henta fjárfestingarstefnu lífeyrissjóða tiltölulega vel.

Stórir gjalddagar í síðasta mánuði

Alls keyptu erlendir fjárfestar ríkisbréf í útboðum Seðlabankans fyrir 28,9 ma.kr. í júní, sem svarar til tæplega tveggja þriðjuhluta sölu bankans í útboðum í síðasta mánuði. Þetta telja Seðlabankamenn í riti sínu til marks um aukinn áhuga útlendinga á kaupum á innlendum ríkisbréfum. Hins vegar ber að hafa í huga að í júní var gjalddagi á miklu magni ríkisbréfa, ríkisvíxla og innstæðubréfa sem að mestu leyti var í eigu útlendinga. Þannig var ríkisbréfaflokkurinn RIKB 09 0612 á lokagjalddaga í mánuðinum, en útlendingar áttu 71 ma.kr. að nafnverði í þeim flokki. Einnig áttu þeir 11,5 ma.kr. af þeim 20 mö.kr. ríkisvíxlaflokki sem féll á gjalddaga í síðasta mánuði, en keyptu aðeins 1,2 ma.kr. af nýjum ríkisvíxlum í útboði Seðlabankans í júní. Síðast en ekki síst voru innstæðubréf Seðlabankans að upphæð 67 ma.kr. á gjalddaga í júní, en langstærstur hluti þeirra var í eigu útlendinga. Erlendir fjárfestar fengu því í hendurnar í kring um 140 ma.kr. í júní, að vöxtum meðtöldum, vegna gjalddaga ríkisverðbréfa og innstæðubréfa, en kusu aðeins að endurfjárfesta ríflega 30 ma.kr. í ríkisverðbréfum í útboðum Seðlabankans. Mismunurinn liggur trúlega að mestu leyti á krónureikningum Seðlabanka og erlendra sem innlendra fjármálastofnana, þótt einnig kunni útlendingar að hafa fjárfest í ríkisverðbréfum á eftirmarkaði í einhverjum mæli. Snörp hækkun á bundnum innlánum fjármálastofnana í Seðlabankanum, og síðan hinum nýju innstæðubréfum þeirra hjá bankanum, rennir stoðum undir þessa skoðun okkar.

Háar vaxtagreiðslur til útlendinga

Ríkisverðbréf í erlendri eigu eru talsvert stór hluti af krónueignum útlendinga, en sem fyrr segir reiknast okkur til að eign þeirra í ríkisbréfum og ¿víxlum hafi numið nálega 180 mö.kr. í júnílok. Á meðan gjaldeyrishöftin eru við lýði er líklegt að eign þeirra í ríkistryggðum pappírum verði áfram veruleg, þar sem þeim er óheimilt að flytja höfuðstól krónueignar sinnar úr landi, og fátt um aðra kosti til ávöxtunar á krónueigninni að innlánsreikningum frátöldum. Sá galli er hins vegar á gjöf Njarðar að meðan þessi er raunin renna háar vaxtagreiðslur úr ríkissjóði til útlendingana, sem margir hverjir vilja þó frekar hverfa úr krónunni en þiggja þessa vexti. Harður tónn Seðlabanka undanfarið hefur auk heldur átt stóran þátt í að hækka verulega ávöxtunarkröfu ríkisbréfa, sem eykur við fjármagnskostnað ríkissjóðs við öflun á nýju lánsfé. Núverandi umhverfi hafta og hækkandi ávöxtunarkröfu á markaði gæti því í raun aukið á þann vanda sem felst í þrýstingi á krónu vegna óþolinmóðra erlendra fjárfesta á næstunni, þrátt fyrir þróun ríkisverðbréfaeignar útlendinga í júní.“