Um 16 milljarðar í Sjóvá til að styrkja eiginfjárstöðuna

Sjóvá

Fjárhagslegri endurskipulagningu Sjóvár er lokið. Nýtt félag undir merkjum Sjóvár verður stofnað sem yfirtekur einungis vátryggingastarfsemi hins eldra félags. Þetta felur í sér að fasteignatengd fjárfestingastarfsemi er skilin frá hefðbundinni vátryggingastarfsemi Sjóvár. Viðskiptaráðuneytið segir í tilkynningu að staða tryggingataka sé örugg.

Glitnir, SAT eignarhaldsfélag (félag í eigu Glitnis) og Íslandsbanki, hafa lagt um 16 milljarða inn í Sjóvá til að bæta eiginfjárstöðu félagsins og tryggja rekstur þess til framtíðar. Ríkissjóður hefur veitt SAT eignarhaldsfélagi fyrirgreiðslu, í formi skuldabréfa, gegn veði í hlutafjáreign SAT eignarhaldsfélags í Sjóvá. Með aðkomu sinni vilja stjórnvöld standa vörð um kröfur ríkisins og um leið hagsmuni fjölmargra vátryggingataka. Hafinn verður undirbúningur að formlegu söluferli Sjóvár á næstu mánuðum.

Með endurskipulagningunni uppfyllir Sjóvá öll skilyrði Fjármálaeftirlitsins um vátryggingastarfsemi, félagið hefur nægar eignir á móti vátryggingaskuld og eiginfjárstaða þess er traust.

Sú rannsókn sem nú stendur yfir af hálfu yfirvalda snertir í engu núverandi starfsemi Sjóvár. Starfsmenn félagsins munu veita yfirvöldum allar upplýsingar og aðstoða við rannsókn málsins eins og kostur er.

Í yfirlýsingu vegna þessa segist Hörður Arnarson, forstjóri Sjóvár vera afar ánægður með niðurstöðuna:

„Með víðtæku samstarfi Glitnis, Íslandsbanka, stjórnvalda og Fjármálaeftirlitsins hefur rekstur Sjóvár verið tryggður til framtíðar sem og hagsmunir vátryggingataka félagsins. Sjóvá mun hér eftir sem hingað til leggja höfuðáherslu á að veita viðskiptavinum sínum fyrsta flokks þjónustu og vera í fararbroddi á íslenskum vátryggingamarkaði. “

Viðskiptaráðuneytið staðfestir trausta stöðu

Í tilkynningu frá viðskiptaráðuneytinu því lýst yfir að staða tryggingataka Sjóvár sé örugg.

Bent er á að undanfarna mánuði hafi verið unnið að endurskipulagningu rekstrar og fjárhags tryggingafélagsins sem hafi verið undir sérstöku eftirliti Fjármálaeftirlitsins (FME) á þar sem það uppfyllti ekki skilyrði um gjaldþol vátryggingafélaga.

FME hefur auk þess gert umfangsmikla rannsókn á rekstri og stöðu vátryggingafélagsins. Hefur rannsóknin leitt til þess að ákveðnum þáttum var vísað til sérstaks saksóknara sem tekur ákvörðun um hvort ákærur verða gefnar út.

Það er mat FME að flutningur vátryggingastofna yfir í nýtt vátryggingarfélag sem rekið væri undir merkjum Sjóvár – Almennra trygginga sé ákjósanlegasta leiðin sem minnst raskar hagsmunum vátryggingartaka, segir í tilkynningunni. Þá er ekki talið líklegt að önnur innlend tryggingafélög geti að óbreyttu tekið við vátryggingastofnum Sjóvár:

„Viðskiptaráðuneytið er sammála þessu mati og telur jafnframt ljóst að ekki sé grundvöllur fyrir áframhaldandi starfsemi Sjóvá- Almennra trygginga að óbreyttu.

Vegna þessa mun nýtt vátryggingafélag sem stofnað hefur verið um vátryggingarekstur Sjóvá-Almennra trygginga h.f. taka yfir vátryggingareksturinn.

Fjármálaeftirlitið mun birta auglýsingu um flutning vátryggingastofna Sjóvá-Almennra trygginga h.f. til hins nýja félags og þau réttindi sem vátryggingartökum eru tryggð við slíkan flutning. Hið nýja félag mun starfa undir merkjum Sjóvá.

Að mati ráðuneytisins eru hagsmunir vátryggingartaka og annarra sem eiga hagsmuni á grundvelli vátryggingarsamninga tryggðir með þeim aðgerðum sem hér hefur verið gerð grein fyrir.“