Aldrei sátt um að Bretar og Hollendingar fái „allt“ sitt

Stöð 2

Bjarni Benediktsson

Á fundi í Haag um Icesave-málið gerði Bjarni Benediktsson, formaður Sjálfstæðisflokksins, fjármálaráðherra Hollands og aðstoðarfjármálaráðherra Bretlands, það ljóst að aldrei mundi nást nein sátt í Icesave-málinu hér á landi gagnvart kröfu þeirra, sem ríkisstjórn Íslands hefði samþykkt, að þeir fengju allt „sitt“ greitt. Héldu þeir fast við slíka kröfu, yrði dómur að falla um hana, svo að Íslendingar teldu sér skylt að verða við henni. Þetta kemur fram á heimasíðu Björns Bjarnasonar, sem telur nauðsynlegt að ganga til þjóðaratkvæðagreiðslunnar um Icesave til að sýna Bretum og Hollendingum „svar á hvítu, að þeir standa andspænis einhuga þjóð“.

Steingrímur J. Sigfússon, fjármálaráðherra, Bjarni Benediktsson, formaður Sjálfstæðisflokksins og Sigmundur Davíð Gunnlaugsson, formaður Framsóknarflokksins, áttu í gær fund með fjármálaráðherra Hollands og aðstoðarfjármálaráðherra Bretlands. Í samtali við Morgunblaðið segir Steingrímur J. Sigfússon að fundurinn hafi verið gagnlegur og staðan skýrst. Menn átti sig betur á því hvernig báðir aðilar meta stöðu málsins. Aðspurður hvort greina megi afstöðubreytingu hjá Hollendingum í kjölfar synjunar forsetans á Icesave-lögunum segir Steingrímur þá „auðvitað hafa áhyggjur af þessari stöðu“:

„Þeir vilja gjarnan að þetta mál leysist um leið og þeir vilja fara varlega, vegna þess að þeir vilja skiljanlega ekki blandast inn í viðkvæma pólitíska stöðu á Íslandi og viðkvæmt ferli í aðdraganda þjóðaratkvæðagreiðslu.“

Morgunblaðið hefur það eftir Sigmundi Davíð að í ljós hafi komið að hægt sé að ræða við þessa menn. Hann segist vera bjartsýnn á að hægt verði að ná nýjum samningum sem verði hagstæðari fyrir okkur Íslendinga. Í svipaðan streng tekur Bjarni Benediktsson:

„Vilji er allt sem þarf. Þetta mál er á viðkvæmu stigi og það er ekki hægt að úttala sig um allt það sem menn eru að hugsa um. Menn verða auðvitað að geta þreifað á ýmsum sviðsmyndum sem eru dregnar upp án þess að úttala sig um þær. Þau skilaboð sem ég fór með inn á þennan fund eru nákvæmlega þau sömu og við höfum talað fyrir hér heima. Þetta var ekki samningafundur.“

Gildra?

Björn Bjarnason segir á heimasíðu sinni að strax og fréttir hafi borist af því að Bjarni Benediktsson og Sigmundur Davíð Gunnlaugsson „hefðu haldið til Amsterdam með Steingrími J. Sigfússyni fór hrollur um marga sjálfstæðismenn, vegna þess hve mikla skömm þeir hafa á framgöngu Steingríms J., sem hvað eftir annað hefur sýnt, að hann svífst einskis í þágu ráðherravaldanna.Töldu þeir, að Steingrímur J. væri að draga þá í gildru til að komast undan því, að Icesave-málið færi í þjóðaratkvæðagreiðslu. Hann vildi sannfæra stjórnarandstöðuna, að ekki yrði lengra komist gegn Bretum og Hollendingum.“

Björn leggur áherslu á nauðsyn þess að ganga til þjóðaratkvæðagreiðslunnar:

„Hin mikla athygli, sem atkvæðagreiðslan fær á alþjóðavettvangi, verður til að þrýsta á stjórnvöld í Bretlandi og Hollandi úr annarri átt en frá Íslandi, það er frá þeirra eigin kjósendum.“