Verið að reyna að brjóta VR niður

Ed

Meirihluti stjórnar VR segir að samtökin Nýtt Ísland, sem stofnuð voru í tengslum við kosningar í VR á síðasta ári, beiti kröfum sínum í að brjóta félagið niður. Harmað er að nokkrir stjórnarmenn í VR tengist samtökum sem virðast m.a. hafa það á stefnuskrá sinni að leggja niður Alþingi Íslendinga.

Í tilkynningu frá meirihluta stjórnar VR segir að samtökin Nýtt Ísland hafi reynt að ná völdum í VR í kosningum um forystu félagsins á síðasta ári en formannsefni þeirra náði ekki kjöri. Síðan hafi samtökin beint spjótum sínum að VR, m.a. með dylgjum og óhróðri á vefsíðu samtakanna:

„Hvað vakir fyrir þeim vitum við ekki en hins vegar er ljóst að þrír stjórnarmenn í VR, Bjarki Steingrímsson, Guðrún Jóhanna Ólafsdóttir og Ragnar Þór Ingólfsson, hafa sterk tengsl við þessi samtök.

Meirihluti stjórnar VR harmar að stjórnarmenn í félaginu leggi lag nafn sitt við samtök af því tagi sem hér um ræðir. Til marks um þá stefnu sem samtökin aðhyllast er eftirfarandi sem birt er á heimasíðu þeirra:

• Við erum hægrisinnaður félagsskapur sem er til í að styðja enn frekar undir sjálfstæði Íslendinga.
• Lífeyrissjóðum fækkað úr 29 í einn.
• Ríkisstarfsmönnum fækkað verulega. Öllum millistjórnendum, framkvæmdastjórum og forstjórum sagt upp á 1.- 3ja ára uppsagnafresti.
• Utanþingstjórn / starfsstjórn verði komið á sem fyrst.
• Smá sem stór brot verði skilgreind í hertari refsiramma þar sem það á við.
• Lýðreglu verði komið á ásamt sérstakri lögreglu sem vinnur í leyni að því að útrýma almennri glæpastarfsemi á Íslandi .
• Fangelsi gerð rammgirtari og fjölgað. Skylduvinna og ábótakerfi fyrir fanga verði komið upp.
• Er það nauðsynlegt að við Íslendingar þurfum 63 þingmenn? Þurfum við Alþingi? Þurfum við stjórnmálaflokka? Er hægt að hugsa Ísland án stjórnmálaflokka?