Forstjóri Nýherja: Bankarnir halda þrotafyrirækjum í samkeppni við þau rekstrarhæfu

Nýherji

Þórður Sverrisson, forstjóri Nýherja.

Þórður Sverrisson, forstjóri Nýherja, gagnrýndi bankana á fundi Viðskiptaráðs í morgun fyrir að taka yfir fyrirtæki sem væru komin í greiðsluþrot og halda rekstri þeirra áfram í samkeppni við þau fyrirtæki sem enn séu rekstrarhæf. Hann nefndi, að sögn mbl.is, Teymi sem dæmi um fyrirtæki sem fyrir löngu hefði átt að vera gjaldþrota en hefði verið haldið á lífi þar sem eigendur hefðu einnig verið stórir bankaeigendur.

Í frétt mbl.is segir m.a.:

„Eftir hrun hafa margir einstakir markaðir á Íslandi skroppið saman með þeim afleiðingum að pláss er fyrir færri fyrirtæki á þessum mörkuðum. Því ættu, undir eðlilegum kringumstæðum, þau fyrirtæki að hverfa á braut sem verst hafa verið rekin eða standa höllum fæti af öðrum orsökum. Kom þetta fram í máli Þórðar Sverrissonar, forstjóra Nýherja, á fundi Viðskiptaráðs í dag.

Hann segir hins vegar að of oft séu slík fyrirtæki tekin yfir af bönkunum. Segir hann að fyrirtæki sem komin séu í greiðsluþrot eigi annað hvort að setja í gjaldþrot eða selja strax. Ekki sé heppilegt að bankar taki yfir meirihluta hlutafjár og haldi rekstri fyrirtækjanna áfram í samkeppni við þau fyrirtæki sem enn séu rekstrarhæf.

Sagði hann að í sumum tilfellum, eins og í dæmi Teymis, væri um að ræða fyrirtæki sem fyrir löngu hefðu átt að vera gjaldþrota en hefði verið haldið á lífi þar sem eigendur þeirra hefðu einnig verið stórir eigendur í bönkunum. Skjóti því skökku við að þessi sömu fyrirtæki séu nú aftur með bankana sem bakhjarla í samkeppni við önnur fyrirtæki.

Sagði hann að það sjónarmið að hámarka eigi verðmæti í þágu bankanna. Ættu bankarnir ekki að taka afleiðingum ákvarðana sinna eins og aðrir? Þá spurði hann hvort raunhæft væri að bankinn gæti rekið fyrirtæki betur en fyrri eigendur þeirra.“

Í fréttinni er einnig vísað til framsöguræðu Ásmundar Stefánssonar, bankastjóra Landsbankans, sem sagði að við meðferð á þeim fyrirtækjum sem féllu í fang bankanna þyrfti að horfa til fleiri þátta. Til dæmis hvaða áhrif það hefði á atvinnustig í landinu ef fyrirtæki væru gerð gjaldþrota.

Þá er þess getið að Þorsteinn Þorsteinsson, stjórnarformaður Bankasýslu ríkisins, hafi stuttlega vikið að þessu í sínu erindi og sagt að ekki mætti rugla saman bankakerfinu og félagslega kerfinu, þótt ríkið ætti bankana tímabundið.