Sunnudagurinn 13. desember 2009

Ágúst Einarsson formaður Framtaks­sjóðs Íslands

Stjórn Framtaks­sjóðs kom saman til fyrsta fundar síns fyrir helgina og skipti með sér verkum. Ágúst Einarsson, rektor Háskólans á Bifröst, var kjörinn formaður og Ragnar Önundarson, stjórnar­formaður Lífeyris­sjóðs verslunarmanna, var kjörinn varaformaður.

Eyjan: Rafræn kosning um Icesave-málið

Vefmiðillinn Eyjan hefur ákveðið að efna til þjóðar­kosningar um Icesave-málið á netinu frá og með deginum í dag og fram á fimmtudag, 17. desember. Um er að ræða kosningu en ekki hefðbundna skoðanakönnun. Notast er við kerfið Íslendingaval þróað af Íslenskri erfðagreiningu. Kerfið tryggir öryggi og nafnleynd.

Stjórnar­andstaðan í Svíþjóð næði naumum meirihluta

Færu kosningar fram í Svíþjóð nú fengi stjórnar­andstaðan nauman meirihluta, að því er ný skoðanakönnun sýnir. Jafnaðarmenn vinna á en Hófsami hægri­flokkurinn, flokkur Fredrik Reinfeldt forsætis­ráðherra, tapar að sama skapi.

Gagnrýna hægagang við rannsókn Air France-slyssins

Fjölskyldumeðlimir þeirra sem fórust með Airbus A330 þotu Air France sem steyptist í hafið úti fyrir Brasilíu fyrr á árinu gagnrýna rannsóknar­nefndina sem fer með málið fyrir hægang. Þeir segja að ekkert hafi gerst í málinu frá því í júní og saka yfirvöld um að vita meira en þau segja. Skýrslu vegna slyssins er að vænta á fimmtudaginn.

Iðnaðar­ráðherra fái heimild til að semja um byggingu gagnavers

Lagt hefur verið fram stjórnar­frumvarp þar sem iðnaðarráðehrra verður veitt heimild til að semja við Verne Holdings ehf. og Verne Real Estate ehf. og eigendur þeirra, Teha Investments S.a.r.l. og Novator, um gagnaver í Reykjanesbæ. Ríkis­stjórnin tryggir að tekjuskattur verði ekki hærri en 15% fyrstu fimm árin.

Hallinn verður 14,4 milljörðum meiri en fjárlaga­frumvarpið gerði ráð fyrir

Halli á ríkis­sjóði verður 14,4 milljörðum króna meiri á komandi ári en fjárlaga­frumvarp gerði ráð fyrir. Þetta kemur fram í nefndaráliti fjárlaga­nefndar. Hallinn verður því um 101,8 milljarðar króna í heild.

Bresk yfirvöld taka starfsemi Kaupþings til sérstakrar rannsóknar

Efnahagsbrota­deild Bretlands, (Serious Fraud Office, SFO) hefur hafið undirbúning að sakamálarannsókn á starfsemi Kaupþings. Frá þessu greinir breska dagblaðið The Daily Telegraph, sem segist hafa heimildir fyrir því að SFO muni tilkynna um rannsóknina í komandi viku.