Þriðjudagurinn 10. mars 2009

Vaxta­bætur verða hækkaðar

Viðmiðunarfjárhæð vaxta­bóta hækkar um 25% og unnt verður að breyta gengistryggðum fasteignalánum í hefðbundin verðtryggð lán verði tillögur ríkis­stjórnar­innar að lögum.

Fjármálaráðgjafi ráðinn til að stýra viðræðum við kröfuhafa bankanna

Ríkis­stjórnin hefur ákveðið að koma samningaviðræðum milli nýju bankana sem stofnaðir voru eftir hrun gömlu bankanna og kröfuhafa gömlu bankanna í fastan farveg. Fjármála­ráðuneytið hefur ráðið Þorstein Þorsteinsson rekstrarhag­fræðing til að fara fyrir þessum viðræðum.

Gengi rússnesku rúblunnar styrkist

Rússneska rúblan hækkaði í dag í fyrsta skipti í þrjár vikur gagnvart evru og dollar. Ástæðan er hækkandi verð á olíu og gasi og yfirlýsingar rússneskra stjórnvalda um að rúblan verði varin.

Allir geta tekið milljón af séreignasparnaði

Frumvarp um endur­greiðslu séreignar­sparnaðar var samþykkt samhljóða á Alþingi í dag. Allir landmenn mega taka milljón krónur út úr séreignasparnaði sínum, þ.e. þeir sem á annað borð hafa safnað á slíkan reikning.

Karl V. hættir við framboð

Karl V. Matthíasson alþingis­maður verður ekki í framboði við þingkosningarnar í vor. Hann telur sig ekki hafa fengið hljómgrunn innan Samfylkingar­innar í prófkjöri í Norðvestur­kjördæmi um helgina.

Yfirtaka FME á Straumi hefur ekki áhrif á Íbúðalána­sjóð

Yfirtaka Fjármála­eftirlitsins á Straumi í gær hefur ekki áhrif á fjárhagslega stöðu Íbúðalána­sjóðs, segir í yfirlýsingu sjóðsins.

Banka­stjóri FIH hættir

Lars Johansen, sem verið hefur banka­stjóri FIH Erhvervsbank í Danmörku í 11 ár, lætur af störfum 30. júní næstkomandi. Bankinn er í eigu íslenska ríkisins sem tók veð í honum gegn stórláni til Kaupþings rétt fyrir fallið í haust. Guðni Aðalsteinsson tók við sem varaformaður stjórnar.

Íslandsbanki hvetur Baug til að leggja fram gögn

Sé það vilji forsvarsmanna Baugs Group að taka af allan vafa um fjárhagsstöðu og málefni félagsins er þeim í lófa lagið að veita almenningi og fjölmiðlum aðgang að þeim gögnum sem lögð voru fram fyrir Héraðsdómi í gærmorgun, segir í athugasemd Íslandsbanka.

Methækkun danskra banka í kjölfar hækkunar í Bandaríkjunum

Hin mikla hækkun sem varð á verði hluta­bréfa í Bandaríkjunum í dag smitaði út frá sér. Þannig hækkuðu t.d. danskir bankar verulega í verði. Hækkun Nordea var söguleg, eða 18,1%. Í kjölfarið fylgdi Danske Bank með 10,95%. Sama þróun var annars staðar í Evrópu.

Hrefnuskyttur skulu hafa sótt námskeið í meðferð skutulbyssna

Í reglugerð um hrefnuveiðar er kveðið á um þau skilyrði sem uppfylla þarf til að fá leyfi til veiðanna. Að minnsta kosti einn úr áhöfn skal hafa reynslu af hrefnuveiðum og einnig skulu skyttur sem annast veiðar og aflífun dýra hafa sótt námskeið í meðferð skutulbyssna og sprengiskutlna og í aflífunaraðferðum við hvalveiðar.

Hluta­bréf Century Aluminium hækka um 32%

Hluta­bréf Century Aluminum hafa hækkað gríðarlega í verði í dag eða um liðlega 32%. Viðskipti með bréfin eru óvenju mikil. Century er móður­félag Norðuráls á Grundartanga og hefur uppi áform um byggingu álvers í Helguvík.

Mikil hækkun á hluta­bréfum í Bandaríkjunum

Mikil hækkun verið á verði hluta­bréfa í Bandaríkjunum það sem af er dags. Fyrir stundu hafði Dow Jones iðnaðarvísitalan hækkað um 4,13% og Nasdaq um 5%. Þá hefur S&P 500 vísitalan hækkað um 4,7%.

Skila­nefnd Glitnis undrast áróðurskennda yfirlýsingu Baugs

Skila­nefnd Glitnis undrast áróðurskennda yfirlýsingu Baugs Group hf. sem send hefur verið fjölmiðlum og vísar henni alfarið á bug, segir í athugasemd skila­nefndarinnar þar sem fram kemur að hún standi í einu og öllu við málatilbúnað sinn.

Jóhanna undir feldi vegna formennsku

Jóhanna Sigurðar­dóttir forsætis­ráðherra segir að hún sé að íhuga hvort hún eigi að gefa kost á sér í formennsku Samfylkingar­innar. Það sé skylda hennar en áskoranir um að hún taki við embættinu hafi komið henni á óvart.

Listi Moody's yfir stór­fyrirtæki í mestri gjaldþrotahættu

Mats­fyrirtækið Moody's hefur birt lista 283 stórfyrirtækja sem eru í mestri gjaldþrotahættu vegna mikillar skuldsetningar. Helstu fyrirtæki á þessum lista eru hart leiknir bílaframleiðendur í Bandaríkjunum, spilavíti, smásöluverslanakeðjur, dagblöð, sjónvarpsstöðvar, flugfélög og orku­fyrirtæki.

Segir Bjarna Harðarson fara fram í Reykjavík norður

Bjarni Harðarson, fyrrverandi alþingis­maður, mun skipa efsta sæti L-listans í Reykjavíkur­kjördæmi norður, segir héraðsblaðið Sunnlendingur. Áður var reiknað með honum í efsta sæti listans í Suður­kjördæmi.

Flug og gifting

Á Landvetterflugvellinum í Gautaborg voru í fyrra gefin saman 157 hjón. Skilyrði hjónavígslunnar er að hjónin séu skráð í flug. Kirkjuleg vígsla tekur um korter en borgaraleg innan við fimm mínútur. Svo er bara að vona að vélinni seinki ekki.

Eva Joly verður ráðgjafi vegna rannsókna á efnahagsbrotum

Eva Joly, sem er víðkunn af rannsóknum sínum á fjármálabrotum og fjármálaspillingu í Evrópu, verður sérstakur ráðgjafi vegna rannsókna á efnahagsbrotum sem tengjast hruni fjármálakerfisins hér, að tillögu dómsmála­ráðherra.

Stuðlað að endur­skipulagningu mikilvægra atvinnufyrirtækja

Ríkis­stjórnin hefur samþykkt frumvarp fjármála­ráðherra um stofnun hluta­félags í eigu ríkisins til að stuðla að endur­skipulagningu þjóðhagslegra mikilvægra atvinnufyrirtækja. Hluta­félagið verður starfrækt tímabundið.

Eðli og uppruni kreppa á Viðskiptaþingi

Dr. Pedro Videlo hagfræðiprófessor mun á Viðskiptaþingi fjalla um eðli og uppruna kreppa af því tagi sem Ísland á nú við að etja, reynslu frá öðrum löndum og aðgerðir sem líklegastar eru til að vinna bug á ástandinu.Viðskiptaþing verður haldið á fimmtudaginn.

ESB vill fjórfalda framlag til Alþjóða­gjaldeyris­sjóðsins

Framlög til Alþjóða­gjaldeyris­sjóðsins (AGS) verða stóraukin svo hann megni að aðstoða lönd sem stríða við mikinn efnahagsvanda. Um þetta voru fjármála­ráðherrar ESB samála. Þeir stefna að því að tvöfalda framlög til sjóðsins en styðja fjórföldun. Hætt er við að sjóðir AGS tæmist dragist kreppan á langinn.

Fiskneysla bætir námsárangur sænskra táningspilta

Niðurstöður vísindamanna við háskólann í Gautaborg benda eindregið til þess að fiskneysla stuðli að bættum námsárangri táningspilta. Þeir úr hópnum, sem borðuðu fisk oftar en einu sinnu í viku, náðu tæplega 11% betri námsárangri en jafnaldrar þeirra að þremur árum liðnum.

Færeyskt tryggingar­félag vill á íslenskan markað

Tryggingar­felagið Føroyar (TF) stefnir að því að hefja starfsemi á Íslandi fyrir árslok 2009. Álitlegasti kosturinn, að mati félagsins, er að kaupa að fullu eða að hluta tryggingar­félag í rekstri og ráðamenn TF sjá ýmsa möguleika í þeirri stöðu.

Gríðarlegar breytingar á gjaldeyris­markaði

Veltan á millibanka­markaði er nú ekki nema svipur hjá sjón miðað við það sem áður var. Tvo fyrstu mánuði ársins var velta á millibanka­markaði tæpir 4 milljarðar króna í hvorum mánuði en fyrir hrun nam veltan hundruðum milljarða í hverjum mánuði.

Engum blekkingum beitt segja Baugs-menn

Gunnar Sigurðsson, for­stjóri Baugs Group og Stefán Hilmarsson, aðstoðar­for­stjóri, hafna þeim staðhæfingum að stjórnendur félagsins hafi meðvitað blekkt kröfuhafa eða lagt fram villandi upplýsingar. Þetta kemur fram í yfirlýsingu sem þeir hafa sent frá sér.

Útlendingar áhugalitlir um ríkispappíra

Útlendingar hafa undanfarið verið áhugalitlir um útboð ríkisvíxla og -bréfa en áhugi innlendra aðila á slíkum bréfum hefur verið þeim mun meiri, segir Greining Íslandsbanka.

Telja að atvinnuleysi í Bandaríkjunum fari í 9,4%

Ástandið á bandarískum vinnu­markaði versnar stöðugt. Boomberg fréttaveitan leitaði til 54 hag­fræðinga og telja þeir að atvinnuleysi fari í 9,4% á árinu og haldist hátt út árið 2011. Búist er við 2,5% samdrætti í bandarísku efnahagslífi í ár. Fari svo hefur samdrátturinn ekki verið meiri milli ára frá árinu 1946.

Danskir bensínþjófar gerast æ kræfari

Það er víðar en á Íslandi sem eldsneytisþjófnaður fer vaxandi. Í Danmörku jókst slíkur þjófnaður á bensínstöðvum um 50% milli áranna 2007 og 2008. Forráðamenn bensínstöðvanna hafa brugðið á það ráð að birta myndir af þjófunum en mega eiga von á sektum fyrir tiltækið.

Neytendastofa beitir Og fjarskipti dagsektum

Neytendastofa hefur lagt dagsektir á Og fjarskipti ehf. (Vodafone) þar sem fyrirtækið hefur ekki farið að ákvörðun Neytendastofu. Og fjarskiptum var bönnuð notkun orðsins fríkeypis fyrir þjónustu sem greiða þarf fyrir en hafa ekki fjarlægt orðið af vefsíðu sinni.

Ríkisaðstoð þarf ekki að kosta Barclays sjálfstæðið

Stórbankinn Barclays klárar sig betur en helstu bresku keppinautarnir, risabankarnir Royal Bank of Scotland og Lloyds Banking Group. Það eykur líkur á því að Barclays fái hlut í neyðarpakka breska ríkisins án þess að þurfa að láta af sjálfstæði sínu.

Biðlað til Jóhönnu um tímabundna formennsku

Á meðan beðið er eftir svari Jóhönnu kunna orð Össurar Skarphéðinssonar um að engin forystukreppa sé í Samfylkingunni, að vera rétt. En hitt er ljóst að standi Jóhanna fast á sínu kann mat utanríkis­ráðherra að breytast. Og merkilegt er að innan Samfylkingar­innar er litið á hugsanlega formennsku Jóhönnu Sigurðar­dóttir sem tímabundna lausn í 1-2 ár.

AGS mun koma Zimbabwe til bjargar

Alþjóða­gjaldeyris­sjóðurinn (AGS) er reiðubúinn til að koma Afríkuríkinu Zimbabwe til aðstoðar. Búist er við að neyðaraðstoð verði kynnt í næsta mánuði. Efnahagur landsins er í rúst, atvinnuleysi gríðarlegt og verðbólga stjarnfræðileg.

Peningaleg eign hins opinbera versnaði um 312 milljarða

Hrein peningaleg eign hins opinbera, þ.e. peningaleg eign umfram skuldir, var neikvæð um 301 milljarð króna í árslok 2008, eða sem svarar 20,5% af landsframleiðslu. Hún hafði versnað um rúmlega 312 milljarða króna milli ára eða um 21,4% af landsframleiðslu.

Opin nýsköpun á Nýsköpunarþingi

Opin nýsköpun verður yfirskrift Nýsköpunarþings Rannís, Nýsköpunar­miðstöðvar og Útflutningsráðs sem verður haldið næstkomandi fimmtudag. Þar veitir menntamála­ráðherra Nýsköpunarverðlaun fyrir árið 2009.

Atvinnuleysi í Bandaríkjunum verður 9,4% á þessu ári

Hag­fræðingar reikna með að atvinnuleysi verði 9,4% á þessu ári í Bandaríkjunum og að lítið dragi úr fjölda atvinnulausra fram til ársins 2011. Fjölgun atvinnulausra mun ógna hagvexti. Þetta er niðurstaða könnunar Bloomberg fréttastofunnar meðal hag­fræðinga.

Óvænt verðbólguaukning í Danmörku

Vísitala neysluverðs hækkar í Danmörku. Aukin verðbólga kemur hag­fræðingum þar í landi á óvart. Þeir höfðu búist við lækkun í kjölfar lækkandi orkuverðs og áhrifa efnahagskreppunnar.

Verður Volvo sænskur á ný?

Volvo gæti orðið sænskur á ný. Verksmiðjurnar eru í eigu Ford en bandaríski bílaframleiðandinn vill selja. Meðal áhugasamra kaupenda er hópur sænskra fjárfesta. Kínverjar banka einnig á dyrnar hjá Ford.

Opinn borgarafundur: 500 milljarðar til eigenda - glæpur eða vinagreiði

Opinn borgarafundur verður haldinn í Iðnó miðvikudaginn 11. mars kl. 20-22 undir yfirskriftinni: 500 milljarðar til eigenda - glæpur eða vinagreiði. Frummælendur verða Atli Gíslason þingmaður, Bjarni Benediktsson þingmaður og Björn Þorri Viktorsson hæstaréttarlögmaður.