Laugardagurinn 14. febrúar 2009

Jón Ásgeir með nýja áætlun fyrir Baug Group

Jón Ásgeir Jóhannesson og stjórnendur Baugs Group ætla að leggja fram nýja áætlun um framtíð félagsins, að því er Visir.is segir í frétt. Markmiðið er að allir kröfuhafar félagsins fái kröfur sínar greiddar. Áætlunin verður lögð fram á stjórnar­fundi á mánudag.

Ekki samið um samstarf eftir kosningar

Össur Skarphéðinsson, utanríkis- og iðnaðar­ráðherra, segir að ekki hafi verið rætt um áframhald á ríkis­stjórnar­samstarfi Samfylkingar og Vinstri grænna, að loknum kosningum. Málið verði væntanlega rætt eftir kosningar í apríl.

Valgerður hættir í stjórnmálum

Valgerður Sverris­dóttir, þingmaður Framsóknar­flokksins og fyrrverandi ráðherra, hefur ákveðið að láta af þingmennsku í komandi kosningum. Hún greindi frá þessari ákvörðun á heimasíðu sinni og síðan á kjördæmisþingi framsóknar­manna sem haldið var í dag.

Lúxusíbúð Jóns Ásgeirs í New York til sölu á 2,9 milljarða

Jón Ásgeir Jóhannesson og Ingibjörg Pálma­dóttir hafa sett lúxusíbúð sína í New York í sölu. Ásett verð er 25 milljónir dollara eða tæpir 2,9 milljarða króna. Íbúðin er á einum besta stað á Manhattan. Að sögn New York Times var íbúðin sett á söluskrá fyrir tveimur vikum.

Donald Trump á flótta

Donald Trump hefur sagt sig úr stjórn Trump Entertainment Resorts, sem er gríðarlega skuldsett. Með þessu er milljarðamæringurinn í raun að forða sér frá gjaldþrota fyrirtæki. Lánadrottnar munu að líkindum óska eftir greiðslustöðvun í komandi viku.

Skoða riftunarmál vegna sölu Baugs á Högum

Hugsanlegt er að smærri fjármála­fyrirtæki sem eiga verulega kröfur á Baug Group muni höfða riftunarmál vegna sölunnar á Högum til fjárfestingar­félags Jóns Ásgeirs Jóhannessonar og fjölskyldu á síðasta ári. Baugur er nú í greiðslustöðvun og alls óvíst um framtíð fyrirtækisins.

Tilnefningar til blaðamannaverðlauna

Dóm­nefnd Blaðamannaverðlaunanna hefur komið sér saman um þrjár tilnefningar í hverjum af hinum þremur flokkum verðlaunanna. Laugardaginn 21. febrúar verður síðan tilkynnt um hverjir verðlauna­hafarnir eru í hinum einstöku flokkum.

Vilhjálmur Bjarnason viðskipta­fræðingur ársins

Vilhjálmur Bjarnason, lektor við Háskóla Íslands var valinn viðskipta­fræðingur ársins á þekkingardegi Félag viðskipta- og hag­fræðinga í gær. CCP var valið þekkingar­fyrirtæki ársins, en þrjú fyrirtæki voru til­nefnd.

Samfylking og Vinstri grænir vilja samstarf eftir kosningar

Katrín Jakobs­dóttir, menntamála­ráðherra og varaformaður Vinstri grænna, segir í viðtali við Kolbrúnu Bergþórsdóttur í Morgunblaðinu, að áhugi sé á því að Samfylking og vinstri grænir haldi samstarfi áfram eftir alþingis­kosningar í apríl. Hún segir að flokkarnir þurfi að ná lendingu í Evrópu­málum.

Helgi Seljan og Kastljós þegja þunnu hljóði vegna Jóhönnu Sigurðardóttur

Björn Bjarnason, alþingis­maður og fyrrverandi dómsmála­ráðherra gagnrýnir Kastljós og Helga Seljan sérstaklega, fyrir að þegja þunnu hljóði yfir því að Jóhanna Sigurðar­dóttir hafi,sem félagsmála­ráðherra, brotið stjórnsýslulög samkvæmt niðurstöðu Héraðsdóms.