Mánudagurinn 2. febrúar 2009

Kristján Guy Burgess aðstoðar utanríkis­ráðherra

Kristján Guy Burgess hefur verið ráðinn aðstoðar­maður Össurar Skarphéðinssonar utanríkis­ráðherra. Kristján hefur meistarapróf í alþjóða­stjórnmálum og alþjóða­lögum.

Fjölskyldudagur LRH

Lög­reglan á höfuðborgar­svæðinu hélt svokallaðan Fjölskyldudag fyrir starfsmenn sína á laugardaginn. Uppákoman heppnaðist í alla staði mjög vel og féll sérstaklega í kramið hjá ungu kynslóðinni.

Nýr ráðuneytis­stjóri í forsætis­ráðuneytinu

Ragnhildur Arnljóts­dóttir hefur verið skipuð í embætti ráðuneytis­stjóra í forsætis­ráðuneytinu til 30. apríl. Hún var ráðuneytis­stjóri í félags- og tryggingamála­ráðuneytinu.

Jóhanna hefur beðið seðlabanka­stjóra að biðjast lausnar

Jóhanna Sigurðar­dóttir, forsætis­ráðherra hefur farið þess á leit við sitjandi seðlabanka­stjóra, að þeir biðjist lausnar svo unnt sé að ganga frá starfslokasamningi við þá. Þá mun hún kynna á morgun frumvarp um breytingar á lögum um Seðlabankann.

Moody's lækkar matið á Barclays

Mats­fyrirtækið Moody's lækkaði í dag lánshæfismat á breska stórbankanum Barclays. Samhliða jókst skuldatryggingar­álag bankans. Markaðurinn telur auknar líkur á framlagi ríkisins til bankans og jafnvel þjóðnýtingu.

Forseti hafði tillögu um þjóð­stjórn að engu

Björn Bjarnason, fyrrverandi dómsmála­ráðherra, segir að forseti Íslands hafi haft að engu tillögu Geir H. Haarde að mynduð yrði þjóð­stjórn og tryggja þannig þingræðislega stjórn. Björn telur að forseti hafi gengið gegn þingræðis­reglu sem gerir ráð fyrir að ríkis­stjórn styðjist við meirihluta á Alþingi.

Ögmundur afnemur innritunargjöld á sjúkrahús

Ögmundur Jónasson heilbrigðis­ráðherra hefur tekið ákvörðun um að afnema innritunargjöld á sjúkrahús en reglugerð þar um tók gildi um áramótin, að því er mbl. greinir frá. Gjaldið var sex þúsund krónur.

Búist við að Obama útnefni ráðherra úr hópi repúblikana

Búist er við að Barack Obama Bandaríkja­forseti útnefni Judd Gregg, öldungar­deildarþingmann Repúblikana­flokksins sem viðskipta­ráðherra síðar í dag. Það veldur, þótt furðulegt megi virðast, nokkrum titringi meðal repúblikana.

Styrkir til háskóla­náms í Kína

Stjórnvöld Alþýðulýðveldisins Kína bjóða fram styrk handa Íslendingum til háskóla­náms í Kína námsárið 2009-2010.

Nær fimmtug Barbie finnur fyrir krumlu kreppunnar

Hagnaður bandaríska leikfangaframleiðandans Mattel, hins stærsta í heimi, á síðasta fjórðungi liðins árs var aðeins helmingur miðað við sama tímabil árið áður. Frægasta leikfang Mattel er án efa Barbie-dúkkan. Jafnvel hún kemst ekki undan krumlu kreppunnar. Vera kann að aldurinn sé farinn að setja mark sitt á hana en hún verður fimmtug í næsta mánuði.

Liverpool selur Robbie Keane til Tottenham

Liverpool hefur selt írska landsliðsmanninn Robbie Keane til Tottenham. Stoppið var því stutt hjá Liverpool. Keane er því kominn heim á ný því hann var hjá Tottenham frá 2002 þar til á liðnu sumri að hann gekk til liðs við Liverpool. Tottenham veitir ekki af styrk enda nálægt fallsæti.

Mikið tap á Ryanair á þriðja fjórðungi

Írska lágfargjaldaflug­félagið Ryanair tilkynnti um 101,5 milljóna evra tap eftir skatta á þriðja ársfjórðungi, eða sem svarar um 15 milljörðum króna. Þrátt fyrir þetta reiknar félagið með hagnaði þegar árið í heild verður gert upp.

Guðbjartur forseti Alþingis

Samkomulag nýju ríkis­stjórnar­flokkanna felur meðal annars í sér að Guðbjartur Hannesson, þingmaður Samfylkingar­innar, verði forseti Alþingis, segir í frétt á Vísi.

Samruni British Airways og Iberia á lokastigi

Samruni flug­félaganna British Airways og hins spænska flug­félags Iberia liggur í loftinu. Unnið hefur verið að sameiningu félaganna frá því í júlí. Hluta­bréf BA hafa fallið mjög í verði á tímabilinu, miklu meira en bréfin í Iberia.

Framkvæmda­stjóri fyrirtækjasviðs Byrs hættir

Samkomulag hefur orðið um að Carl H. Erlingsson, framkvæmda­stjóri fyrirtækjasviðs Byrs, láti af störfum hjá fyrirtækinu frá og með deginum í dag.

Skotar vilja Ísland í ESB til að fá aðgang að fiskimiðunum

Skoskir sjómenn og forvígisimenn samtaka þeirra bíða þess nú í ofvæni að Ísland gerist aðili að Evrópu­sambandinu. Þannig vonast þeir til að Íslandsmið opnist hugsanlega fyrir þeim að nýju, segir á síðu LÍÚ þar sem vitnað er til fréttar The Press and Journal.

Samruni dönsku og sænsku póstþjónustunnar

Danska ríkið hefur keypt 22% hlut fjárfestinga­sjóðsins CVC í danska póstinum, Post Danmark. Kaupin eru liður í sameiningu dönsku og sænsku póstþjónustunnar. Svíarnir vildu ekki að einkaaðili kæmi að póstþjónustunni. CVC fær í staðinn hlut í belgíska póstinum.

Geir H. Haarde: Aðgerðin gekk vel

Geir H. Haarde, formaður Sjálfstæðis­flokksins, gekkst í dag undir speglunaraðgerð á háskóla­sjúkrahúsinu í Amsterdam þar sem fjarlægt var illkynja mein í vélinda. Aðgerðin heppnaðist vel að því er fram kemur í tilkynningu frá Sjálfstæðis­flokknum.

Guðlaugur Þór býður sig fram í formann Sjálfstæðis­flokksins

Vísir.is fullyrðir að Guðlaugur Þór Þórðarson, fyrrverandi heilbrigðis­ráðherra, hafi ákveðið að sækjast eftir formennsku í Sjálfstæðis­flokknum á landsfundi sem hefst 26. mars næstkomandi. Fullyrt er að Guðlaugur Þór muni tilkynna framboð sitt formlega á morgun.

Einkaneysla minnkar í Bandaríkjunum sjötta mánuðinn í röð

Einkaneysla í Bandaríkjunum dróst saman í desember, sjötta mánuðinn í röð. Hún minnkaði um 1% og var samdrátturinn meiri en búist var við.

Engin viðskiptavakt með hluta­bréf Eimskips

Nýi Landsbankinn hefur sagt upp samningi um viðskiptavakt með hluta­bréf Hf. Eimskipa­félags Íslands. Þar með eru engir samningar um viðskiptavakt fyrir bréf félagsins. Hluta­bréf Eimskips eru á athugunarlista Kauphallarinnar.

Úrskurðar­nefnd lækkar verð um 5-10%

Á fundi Úrskurðar­nefndar sjómanna og útvegs­manna var ákveðið að lækka verð á slægðum og óslægðum þorski, sem ráðstafað er til eigin vinnslu eða seldur til skyldra aðila, um 10%.

Aðgerðir til að efla atvinnuástand

Ásta Ragnheiður Jóhannes­dóttir félags- og tryggingamála­ráðherra hefur ýtt úr vör vinnu við fjölbreyttar aðgerðir gegn atvinnuleysi í samræmi við fyrstu tillögur starfshóps sem skipaður var.

Hluta­bréf falla í Evrópu - bankar leiða lækkunina

Hluta­bréf á helstu mörkuðum Evrópu hafa lækkað í verði það sem af er degi og fylgir lækkunin í kjölfar almennrar lækkunar í Asíu. Barclays baninn hefur lækkað um tæp 11% en lánshæfismat bankans hefur verið lækkað.

Dregur úr verðbólguálagi

Verðbólguálag til þriggja ára á markaði er nú 4,7% en var 6,4% fyrir viku síðan. Verðbólguálag til lengri tíma litið hefur einnig lækkað töluvert, aðallega vegna lækkunar á kröfu lengstu ríkisbréfa­flokkanna, segir Greining Glitnis.

Olía og gas hugsanlega meðal íslenskra auðlinda

Dreka­svæðið fyrir norðaustan landið er það svæði sem helst er talið geyma olíu og gas í vinnanlegu magni hér við land. Land­svæðið er talið síst verra til slíkrar vinnslu fallið en sambærileg svæði við Noreg eða í Barentshafi, segir Greining Glitnis.

Auðmanna­markaður hrynur

Fram til þessa hefur auðmannaparadísin í Dúbaí nánast verið ósnortin af alheimskreppunni, en ekki lengur. Fasteignaverð þar fellur nú hratt.

Rýmri útlána­reglur og fleiri lána­flokkar hjá Íbúðalána­sjóði

Íbúðalána­sjóður fær heimild til lánveitingar til endurbóta og viðhalds á leiguíbúðum. Þá fær sjóðurinn rýmri heimildir til að veita fötluðum einstaklingum aukalán vegna sérþarfa og heimild til veðlánaflutninga milli leiguíbúða sem eru í eigu sama lántakenda.

Toyota í Kópavogi eykur starfshlutfall á verkstæðum í 100%

Vegna góðrar verkefnastöðu á verkstæðum Toyota í Kópavogi hefur verið ákveðið að í febrúar verði starfshlutfall starfsmanna þeirra 100% í stað 90%, segir í tilkynningu fyrirtækisins. 170 nýir fólksbílar seldust í janúar og þar af voru 55 eða 32,4% frá Toyota.

Þrýstiloftsbíll í stað rafbíls?

„Framtíðarbíllinn er loftbíllinn – bíllinn sem keyrir á þrýstilofti. Hann kemst 250 km á hleðslunni og það tekur einungis 2-4 mínútur að full-hlaða tóma loftgeymana. Svo segir Thure Barsøe-Carnfeldt sem verið hefur frumkvöðull rafbíla í Danmörku.

Ögmundur Jónasson mættur í heilbrigðis­ráðuneytið

Fyrsti starfsdagur Ögmundar Jónassonar sem heilbrigðis­ráðherra er í dag. Hann tók að vísu við lyklavöldum í gær en forveri hans, Guðlaugur Þór Þórðarson, afhenti honum lyklana.

Hvað er að frétta af rannsóknum Fjármála­eftirlitsins?

Það er skiljanlegt að marga þyrsti í að vita meira um rannsóknir á vegum Fjármála­eftirlitsins í aðdraganda og kjölfar falls bankanna þriggja, segir Guðrún Jóns­dóttir, sviðs­stjóri á verð­bréfasviði Fjármála­eftirlitsins, m.a. í grein á síðu eftirlitsins en greinin birtist í Morgunblaðinu á laugardaginn.

Fasteignaverð hækkaði á ný í Noregi

Fasteignaverð hækkaði milli desember og janúar í Noregi. Tíðindin komu á óvart og vöktu gleði. Fasteignasalar tóku eftir breytingu í desember, markaðurinn jafnaði sig og kaupendur sýndu sig á nýjan leik.

Nýi Glitnir setur samræmdar reglur vegna fyrirtækja í erfiðleikum

Nýi Glitnir hefur birt á heimasíðu sinni verklags­reglur sem skýrir hvernig bankinn meðhöndlar fullnustu krafna gagnvart fyritækjum í rekstrarerfiðleikum. Þessar viðmiðunar­reglur koma í framhaldi af þeim vinnuramma sem bankinn kynnti til sögunnar um miðjan desember.

Fleiri blondínur í kreppunni

Svar kvenna við fjármálakreppunni er að lita hárið ljóst. Breskur hár­greiðslumeistari segir að sala í ljósum hárlit hafi aukist um 67% frá því að kreppan skall á. Hann segir ljósa hárlitinn fylla konur auknu sjálfsöryggi á örlagatímum. Blondínan er orðin baráttutákn.

Salan á Spanair gerir SAS söluvænna

Norræna flug­félagið SAS seldi spænska vandræðabarnið sitt, Spanair, fyrir lágmarksverð, eina evru. Eftir söluna er SAS sjálft söluvænna fyrirtæki enda laust við blæðandi tap spænska flug­félagsins.

Nokia hótar að yfirgefa Finnland

Finnski farsímaframleiðandinn Nokia, stærsti farsímaframleiðandi í heimi, hótar að flytja með starfsemí sína úr landi fái forráðamenn fyrirtækisins ekki heimild finnskra stjórnvalda til að fylgjast með tölvupósti starfsmanna sinna - svo koma megi í veg fyrir að viðskiptaleyndarmál leki út.

Ætla að breyta yfir­stjórn einstakra ráðuneyta

Ríkis­stjórn Jóhönnu Sigurðardóttur stefnir ekki aðeins að því að skipta út yfir­stjórn Seðlabanka Íslands, heldur á einnig að gera breytingar á yfir­stjórn einstakra ráðuneyta. Þetta kemur fram í verkefnaskrá ríkis­stjórnar­innar sem kynnt var í gær.

Hluta­bréf lækka í Asíu

Hluta­bréf lækkuðu í verði á helstu mörkuðum í Asíu annan daginn í röð. Hitachi lækkaði um 17% eftir að hafa gefið út afkomuviðvörun. Nikkei 225 vísitalan lækkaði um 1,5%.

Víðast góðar aðstæður til akstur en hálka

Það eru frekar góðar aðstæður til aksturs um allt land, hálka eða hálkublettir, stillt veður og frost, samkvæmt upplýsingum Vegagerðarinnar. Hálka er á flestum leiðum á Suðurlandi.