Fimmtudagurinn 22. janúar 2009

Fjarðarheiði ófær og þungfært á Öxnadalsheiði og Mörðudalsöræfum

Nú er víða komið óveður um allt land. Vegfarendur eru beðnir um að athuga vel aksturskilyrði áður en lagt er af stað. Ófært er um Fjarðarheiði. Á Öxnadalsheiði og á Möðrudalsöræfum er þungfært og stórhríð og alls ekkert ferðaveður.

Rannveig, Agnes, Guðrún og Auður Capital hlutu viðurkenningar FKA

Rannveig Rist, for­stjóri álversins í Straumsvík, hlaut FKA viðurkenninguna 2009 en Félag kvenna í atvinnurekstri afhenti í dag sínar árlegu viðurkenningar. Þá hlutu viðurkenningar Agnes Sigurðar­dóttir, Guðrún Birna Gísla­dóttir og Auður Capital.

Ráðherra ræddi útblásturskvóta við flugrekendur

Kvótakerfi verður senn lagt á útblástur í flugsamgöngum. Samgöngu­ráðherra ræddi það og fleira við flugrekendur. Ráðherra sagði að gæta yrði þess að ekki yrðu lagðar ósanngjarnar kröfur á íslenskan flugrekstur en hann yrði þó að taka á sig eðlilegar skuldbindingar.

Ingibjörg Sólrún vill kosningar í vor

Ingibjörg Sólrún Gísla­dóttir, utanríkis­ráðherra og formaður Samfylkingar­innar, vill að boðað verði til alþingis­kosninga í vor. Hún tekur þó fram að Samfylkingin sé enn í stjórnar­samstarfi við Sjálfstæðis­flokkinn, að því er fram kom í fréttum Ríkisútvarpsins.

Íslenskt bygg í baksturinn og bjórinn

Bakarameistarar hafa bundist samtökum um að hefja markvissa notkun á íslensku byggi í brauðgerð og bakstur. Sé byggmjöl notað með hveiti hentar það vel til brauðgerðar. Þá hefur bjór, bruggaður úr íslensku byggi, verið fáanlegur um skeið.

Öruggur staður fyrir þjóðar­gersemarnar

Hönnun er hafin að byggingu fyrir Stofnun Árna Magnússonar í íslenskum fræðum og íslenskuskor Háskóla Íslands. Nýbyggingunni er ætlað að vera öruggur staður fyrir þjóðar­gersemarnar, handritin sem geyma íslenskar fornbókmenntir, eddukvæði, sögur og fleira.

SA: Lágmarka þarf skaðann

Gagnrýni á græðgi og óhóf má ekki verða til þess að drepa niður heilbrigðan metnað til þess að skipa Íslandi örugglega í fremstu röð meðal þjóða heims. Samtök atvinnulífsins leggja til leiðir í atvinnumálum sem byggja á hagsýni, framsýni og áræðni, segja SA sem hafa mótað nýja atvinnu­stefnu.

SA: Skapa verður tuttugu þúsund störf

Þór Sigfússon, formaður Samtaka atvinnulífsins, segir að skapa verði tuttugu þúsund ný störf til ársins 2015 og vinna til baka þau störf sem hafi tapast. Nauðsynlegt sé að marka leið út úr þeim ógöngum sem íslenska þjóðar­búið hafi ratað í.

Forsætis­ráðherra: Fjarstæða að stjórnin hafi setið aðgerðalaus

Fjarstæða er að halda því fram að ríkis­stjórnin hafi setið aðgerðalaus. Þvert á móti hefur verið unnið ötullega á öllum vígstöðvum að því að draga úr neikvæðum áhrifum efnahagserfiðleikanna á hag heimilanna, sagði Geir H. Haarde forsætis­ráðherra í umræðum um efnahagsmál á þingi í dag.

Nýir fulltrúar Íslands í stjórn Norræna fjárfestingarbankans

Fjármála­ráðherra hefur skipað Þorstein Þorsteinsson, fyrrverandi framkvæmda­stjóra Lána­sjóðs sveitar­félaga, sem stjórnar­mann Íslands í stjórn Norræna fjárfestingarbankans. Þá hefur ráðherrann skipað Sigurð Þórðarson, fyrrverandi ríkisendurskoðanda, sem varamann í stjórnina.

Samkeppnis­eftirlitið: Rannsóknin grundvölluð á gögnum

Rannsóknin er grundvölluð á upplýsingum og gögnum sem Samkeppnis­eftirlitið hefur aflað, segir í tilkynningu eftirlitsins vegna húsleitar sem gerð var hjá Fóðurblöndunni og Mjólkur­félagi Reykjavíkur í dag.

Lög­reglumenn fordæma ofbeldisseggi

Lands­samband lög­reglumanna fordæmir í yfirlýsingu framgöngu tiltekinna einstaklinga sem beita lög­reglumenn alvarlegu ofbeldi en stór hópur lög­reglumanna er slasaður eftir atburði undanfarinna daga og einkum eftir nóttina.

Obama hjólar í Kínverjana

Barack Obama Bandaríkja­forseti hefur tekið til óspilltra málanna fyrstu dagana í embætti. Hann hikar hvergi og hjólar þegar í Kínverja vegna skráningar gengis kínverska gjaldmiðilsins. Forsetinn vill að risaveldið í austri skrái júaninn rétt.

431 ökumaður tekinn á Sæbraut

Brot 431 ökumanns var myndað á Sæbraut á þriðjudag eða á tæplega 10 klukkustundum. Fylgst var með ökutækjum sem var ekið í suðurátt, þ.e. yfir gatnamót Sæbrautar og Langholtsvegar.

Microsoft segir 5 þúsund manns upp störfum

Hugbúnaðarrisinn Microsoft neyðist til þess að grípa til verulegra sparnaðar- og aðhaldsgerða. Þær kosta m.a. 5 þúsund starfsmenn fyrirtækisins starfið. Hagnaður eftir annan fjórðung var minni en vænst hafði verið.

Hnakkar freista þjófanna

Það sem af er árinu hefur verið brotist inn í á annan tug hesthúsa á höfuðborgar­svæðinu. Úr þeim flestum hefur hnökkum verið stolið og lætur nærri að fimmtíu slíkir hafa horfið undanfarið.

Sjö lög­reglumenn slösuðust

Sjö lög­reglumenn slösuðust þegar mótmæli í miðborginni fóru úr böndunum annan daginn í röð. Líkt og á þriðjudag rigndi grjóti og glerflöskum yfir lög­regluna um tíma.

Enn lækkar meðalverð á greiðslumarki mjólkur

Meðalverð á greiðslumarki mjólkur lækkar enn, að því er fram kemur hjá Bænda­samtökum Íslands. Meðalverð frá upphafi verðlags­ársins hefur lækkað um 27,3%.

Heimssýn opnar skrifstofu

Heimssýn, hreyfing sjálfstæðis­sinna í Evrópu­málum opnar í dag, fimmtudag kl. 17:00 skrifstofu í húsinu Nýhöfn í Hafnarstræti 18, 2 hæð. Við sama tækifæri verður ný heimasíða samtakanna opnuð á slóðinni www.heimssyn.is.

Greiðslustöðvun Stoða framlengd til 6. apríl

Stoðir, áður FL Group, fá greiðslustöðvun framlengda til 6. apríl, samkvæmt úrskurði Héraðsdóms Reykjavíkur. Félagið, sem hefur verið í greiðslustðvun frá því í haust, hafði farið fram á að hún næði til 20. apríl.

Rangtúlkar Geir skilaboðin frá Ingibjörgu Sólrúnu?

Vísir.is segir að Geir H. Haarde forsætis­ráðherra rangtúlki skilaboð sem hann hefur fengið í samskiptum við Ingibjörgu Sólrúnu Gísladóttur um framhald ríkis­stjórnar­innar. Að sögn visis.is hefur Kristrún Heimis­dóttir, aðstoðar­kona Ingibjargar, fullyrt þetta.

Húsleit hjá Fóðurblöndunni

Samkeppnis­eftirlitið gerði í morgun húsleit á skrifstofu Fóðurblöndunnar hf. vegna gruns um að Fóðurblandan og Mjólkur­félag Reykjavíkur/Lífland hafi viðhaft viðvarandi verðsamráð og að Fóðurblandan ásamt öðrum keppinautum í áburðarsölu, þ.e. Slátur­félags Suðurlands svf. og Skeljungur hf., hafi haft með sér verðsamráð á áburðar­markaði síðast liðið ár. Fóðurblandan vísar ávirðingunum á bug.

Staða Íslands til að greiða niður skuldir sterk

Í átökum sínum við bankahrunið hér á landi býr ríkis­stjórnin afar vel af því að hluti afrakstrar mikils hagvaxtar síðustu ára hefur verið nýttur til að greiða niður skuldir. Geta ríkisins til að greiða niður skuldir á næstu árum er líka nokkuð góð. Með markvissum aðgerðum ætti að vera að hægt að greiða skuldirnar nokkuð hratt niður, segir Greining Glitnis.

Greining Glitnis spáir aukinni verðbólgu í janúar

Við teljum að vísitala neysluverðs muni hækka um 0,7% í janúar. Ef spá okkar gengur eftir mun ársverðbólga aukast úr 18,1% í 18,7%. Eins og jafnan í janúar togast nú á áhrif af útsölum og verðskrárhækkanir, en til viðbótar eru áhrif af gengisfalli krónu á seinni hluta síðasta árs, sem enn er að ýta upp verðlagi, segir Greining Glitnis.

Fjölskyldum lög­reglumanna ógnað

Víða um bloggheima eru nú birtar myndir, upplýsingar um nöfn og heimilisföng auk nákvæmra korta af heimilum lög­reglumanna sem starfað hafa í óeirðasveit lög­reglunnar undanfarna daga. Þá er fólk hvatt til að fara heim til þeirra að að næturlagi.

Örlög Bretlands geta orðið sömu og Íslands

Örlög Stóra-Bretlands geta orðið þau sömu og Íslands. Óttinn við þjóðnýtingu fleiri banka og að þjóðar­skuldir Breta verði meiri en nokkru sinni valda því að pundið fellur eins og steinn. Það gæti því brátt komið að því að Gordon Brown, forsætis­ráðherra Breta, verði að feta í fótspor starfsbróður síns á Íslandi, Geirs H. Haarde, og leita til Alþjóða­gjaldeyris­sjóðsins um aðstoð.

Starfsleyfi Sementsverksmiðjunnar ekki háð umhverfismati

Starfsleyfi Sementsverksmiðjunnar á Akranesi hefur verið endurnýjað og felur það meðal annars í sér heimildir fyrir verksmiðjuna að auka framleiðsluna. Að mati Skipulags­stofnunar eru breytingarnar sem felast í nýju starfsleyfi ekki líklegar til að hafa í för með sér umtalsverð umhverfisáhrif og eru því ekki háðar mati á umhverfisáhrifum.

Sigmundur Ernir og Elín rekin

Sigmundi Erni Rúnarssyni var í morgun sagt upp störfum á Stöð 2. Eiginkonu hans, Elínu Sveinsdóttur útsendingar­stjóra stöðvarinnar var einnig sagt upp. „Þetta eru þakkirnar til okkar hjóna eftir öll þessi ár,“ segir Sigmundur Ernir.

Sjö ungmenni handtekin vegna innbrota í Árnessýslu

Lög­reglan á Selfossi handtók sjö ungmenni í gær vegna innbrots og þjófnaðar í Laugarási í Biskupstungum. Lög­reglu barst tilkynning um grunsamlegar ferðir manna á jeppabifreið í gróðurhúsahverfi í Laugarási rétt fyrir miðnætti síðastliðins þriðjudags.

Framsókn þrefaldar fylgið en Samfylking hrynur

Stuðningur við Framsóknar­flokkinn eykst mikið samkvæmt nýrri skoðanakönnun MMR, Markaðs- og miðlarannsókna ehf., meira en þrefaldast miðað við síðustu könnun og verður sú breyting ekki tengd öðru en nýáfstöðnu landsþingi flokksins og kjöri nýrrar forystu.

Hærri laun en minni kaupmáttur

Laun hækkuðu um 0,7% í desember frá fyrri mánuði. Launavísitala síðustu tólf mánuði hefur hækkað um 8,3%. Kaupmáttur dróst hins vegar saman um 8,2% á sama tímabili.

Upphaf útboðsferils olíuleitar á Dreka­svæði

Iðnaðar­ráðherra opnar í dag vefsíðu vegna olíuleitar á Dreka­svæði. Þar með markast upphaf fyrsta útboðs vegna leyfa til rannsókna og vinnslu kolvetna á landgrunni Íslands.

Bréf hækkuðu í Apple í kjölfar góðrar afkomu

Bréf í Apple hækkuðu um 9% á eftir­markaði í gær í kjölfar góðrar útkomu hátæknirisans. Afkoma fyrsta fjórðungs reikningsárs félagsins var betri en spáð hafði verið.

Segir vanhæfi for­stjóra Hafró til veiðiráðgjafar algert

Friðrik J. Arngrímsson, framkvæmda­stjóri LÍÚ, segir að eftir yfirlýsingar for­stjóra Hafrannsóknar­stofnunar sé vanhæfi hans algert til að koma að veiðiráðgjöf næstu ára í þorski, að því er fram kemur í grein í Fiskifréttum.

Pundið ekki lægra í 23 ár gagnvart dollar

Sterlingspundið hélt áfram að falla í verði gagnvart helstu gjaldmiðlum í gær. Gengi pundsins hefur ekki verið lægra gagnvart dollar í 23 ár. Það sem af vikunnar hefur gengi pundsins lækkað um 8%.

Erlendir fjárfestar vilja Moggann

Tveir erlendir fjárfestar hafa gert formlegt tilboð í Árvakur, útgáfu­félag Morgunblaðsins, að því er blaðið greinir sjálft frá í morgun. Annar þeirra segir í samtali við blaðið að Árvakur sé ein margra fjárfestinga sem þeir hafi áhuga á hér á landi.

Færð sæmileg en víða hálka

Á Suðurlandi eru hálkublettir á Sandskeiði, hálka á Hellisheiði og í Þrengslunum. En er flughált á Krísuvíkurleið. Éljagangur er á felstum leiðum á Norðurlandi samkvæmt upplýsingum Vegagerðarinnar.

Lög­reglan beitti táragasi - tveir lög­reglumenn slasaðir

Í fyrsta skipti í sextíu ár, eða frá mótmælunum á Austurvelli 1949, notaði lög­reglan táragas gegn mótmælendum í nótt. Líkt 1949 var það gert til að dreifa mannfjölda sem safnaðist saman fyrir fram Alþingis­húsið. Tveir lög­reglumenn eru alvarlega slasaðir eftir árás í óeirðunum.