Föstudagurinn 16. janúar 2009

Dönsku fríblöðin metroXpress og 24timer fá opinbera styrki

Fríblöðin tvö í Danmörku, metroXpress og 24timer fá í fyrsta skipti á opinberan styrk nú árið 2009. Blöðin voru harðir keppinautar Nyhedsavisen, fríblaðsins sem Íslendingar stofnuðu í Danmörku árið 2006. Það naut ekki styrkja og varð gjaldþrota í haust.

Nokia kynnir íþróttasíma

Nokia hefur kynnt nýjan síma, Nokia N79 Active, sem sérstaklega er ætlaður íþróttamönnum. Síminn tengist hjartsláttarmæli og inniheldur GPS tæki sem mælir vegalengdir og skráir leiðir.

Framsókn vill viðræður við Evrópu­sambandið

Flokksþing Framsóknar­flokksins hefur samþykkt ályktun um að Ísland gangi til viðræðna við Evrópu­sambandið um hugsanlega aðild, en með vissum skilyrðum. Meðal annars eru skilyrði hvað varðar sjávar­útveg og landbúnað.

Hringdans Valgerðar í Evrópu­málum

Erfitt er að átta sig á stefnu Valgerðar Sverrisdóttur í Evrópu­málum. Í einu orði segist hún hlynnt því að sótt sé um aðild að Evrópu­sambandinu, en í hinu telur hún að tryggja þurfi sérréttindi sem vitað er að aldrei verður fallist á af hálfu Evrópu­sambandsins.

Stjórn LÍÚ fagnar ákvörðun sjávar­útvegs­ráðherra

Stjórn LÍÚ fagnar þeirri ákvörðun Einars K. Guðfinnssonar sjávar­útvegs- og landbúnaðar­ráðherra að auka heildaraflamark í þorski á yfirstandandi fiskveiði ári um 30.000 tonn. Stjórnin áætlar að aflaukningin geti numið 10 milljörðum króna í útflutningstekjum.

Allir banka­stjórarnir stóðust hæfismat FME

Banka­stjórar nýju bankanna hafa farið í gegnum hæfismat Fjármála­eftirlitsins og hefur þeim verið tilkynnt að þeir hafi staðist matið. Frá því var greint í dag að Glitnir ætli að láta alla helstu stjórnendur bankans fara í gegnum sérstakt hæfismat.

For­stjóri Hafró gagnrýnir ákvörðun ráðherra um þorskkvótaaukningu

Jóhann Sigurjónsson, for­stjóri Hafrannsókna­stofnunar, gagnrýnir þá ákvörðun Einars K. Guðfinnssonar sjávar­útvegs- og landbúnaðar­ráðherra að auka þorskkvótann um 30 þúsund tonn. For­stjórinn telur að bíða hefði átt niðurstaðna mælinga á þorsk­stofninum.

Lífslíkur krabba- meinssjúklinga mestar á Íslandi og Svíþjóð

Lífslíkur þeirra sem greinast með krabbamein eru mestar á Íslandi og í Svíþjóð. Þetta eru niðurstöður nýrrar rannsóknar sem unnin var fyrir samtök lyfjafyrirtækja í Evrópu. Lífslíkur sjúklinga í Tékklandi eru mun lakari.

Sporlausar hótunar­greiðslur Baggers

Bústjóri þrotabús danska fjársvikarans Stein Baggers segist hvergi finna merki um peninga­greiðslur til þeirra sem svikarinn segir hafa hótað sér margoft undanfarin ár. Ekki sé þó útilokað að slíkt hafi verið greitt af erlendum reikningum.

Hertz segir 4 þúsund manns upp störfum

Bandaríska bílaleigan Hertz hefur tilkynnt um uppsagnir 4000 starfsmanna. Ástæðan er mikill samdráttur í eftirspurn eftir bílaleigubílum.

Sala hluta íbúðalána SPRON til Íbúðalána­sjóðs á lokastigi

Viðræður við Íbúðalána­sjóð um sölu á hluta af íbúðalánum SPRON að verðmæti 20 milljarða króna eru á lokastigi. Heildarútlán SPRON við níu mánaða uppgjör félagsins árið 2008 námu 206,5 milljörðum króna.

Mótmælafundur í Háskólabíó vegna Gaza

Fjölmörg félaga­samtök, stjórnmálahreyfingar og fjölda­samtök gangast fyrir mótmælafundi í Háskóla­bíói á sunnudaginn undir kjörorðinu: Þjoðarsamstaða gegn fjöldamorðunum á Gaza.

Genís vinnur að tímamótaverkefni í bæklunarlækningum

Líftækni­fyrirtækið Genís vinnur nú að verkefni með framleiðslu á kítínafleiðum sem unnar eru úr rækjuskel. Þróun verkefnisins miðar að vörum til notkunar við bæklunarskurðlækningar með ígræðslu í beinvef. Framkvæmda­stjórinn telur að um tímamótaverkefni sé að ræða, gangi allt eftir.

Konur skipa meirihluta Umferðarráðs í fyrsta sinn

Konur skipa nú í fyrsta skipti meirihluta í Umferðrráði. Af 23 aðalfulltrúum eru 13 konur. Karl V. Matthíasson alþingis­maður er formaður og Birna Hreiðars­dóttir, lög­fræðingur í samgöngu­ráðuneytinu, er varaformaður.

Björn Ingi hættur á Markaðnum

Björn Ingi Hrafnsson, rit­stjóri Markaðarins, viðskiptablaðs Fréttablaðsins, er hættur störfum á blaðinu. Fréttablaðið þarf, eins og aðrir fjölmiðlar, að rifa seglin og fækka fólki, segir hann. Þessi hafi því orðið niðurstaða sín og stjórnenda blaðsins.

100.000.000.000.000 seðill í Zimbawe

Nýjasti peningaseðillinn í Zimbabwe segir allt um ástand efnahagsmála þar. Á honum er talan 100.000.000.000.000 dollarar, eða eitt hundrað þúsund milljarðar Zimbawedollarar, eða 100 billjónir. Þegar Mugabe, forseti landsins, komst til valda árið 1980 var einn Zimbabwedollar jafngildur einu bresku pundi.

Lykil­stjórnendur Nýja Glitnis gangast undir hæfismat

Lögfræði- og regluvörslusvið Nýja Glitnis hefur, að beiðni banka­stjóra og undir stjórn regluvarðar, sett á fót sérstaka fræðslu fyrir framkvæmda­stjóra og lykilstarfsmenn bankans um laga- og regluumhverfi á fjármála­markaði.

Aulaskapur, aðgerðaleysi og taumlaus græðgi

Valgerður Sverris­dóttir, fráfarandi formaður Framsóknar­flokksins, segir framsóknar­menn verðir að móta stefnu sem getur vísað þjóðinni veginn út úr þeim vanda sem við blasir í kjölfar þess að alþjóðleg fjármálakreppa varð að íslensku efnahagshruni, ásamt aulaskap og aðgerðarleysi ríkis­stjórnar­innar og taumlausri græðgi og fífldirfsku fjármálageirans.

Óvinsæli stríðs­forsetinn yfirgefur sviðið

Komið er að leiðarlokum á stjórnmálaferli George W. Bush, 43. forseta Bandaríkjanna, eins umdeildasta stjórnmálamanns í sögu Bandaríkjanna. Við forsetakjörið 2000 var Bush algjörlega óreyndur í utanríkis­málum en hann fer í sögubækurnar sem stríðs­forseti á umbrotatímum og í umdeildum ákvörðunum í alþjóða­stjórnmálum eru örlög stjórnmálaferils hans mörkuð. Stefán Friðrik Stefánsson fer í fréttaskýringu yfir forsetaferil stríðsforsetans frá Texas.

Þriðji stærsti banki Írlands þjóðnýttur

Írsk stjórnvöld tilkynntu í gærkvöld að Anglo Irish bankinn, sem er þriðji stærsti banki landsins, hefði verið þjóðnýttur. Írland hefur ekki farið varhluta af þeim hamförum sem geisað hafa á alþjóðlegum fjármálamörkuðum en landið er gjarnan borið saman við Ísland þegar um það er fjallað, segir Greining Glitnis.

Íbúðaverð lækkar á höfuðborgar­svæðinu

Íbúðaverð á höfuðborgar­svæðinu lækkaði um 1,3% á milli nóvember og desember síðastliðinn samkvæmt upplýsingum sem Fasteignskrá Íslands birti í gær. Íbúðaverð á höfuðborgar­svæðinu lækkaði um 2,5% að nafnverði á síðasta ári og um tæplega 18% að raunvirði, segir Grerining Glitnis.

Laun forsetans lækka í samræmi við laun forsætis­ráðherra

Laun Ólafs Ragnars Grímssonar, forseta Íslands, verða lækkuð á sama hátt og laun forsætis­ráherra. Forsetinn óskaði eftir þessu eftir að Kjararáð úrskurðaði að það hefði ekki heimild til að lækka laun forsetans.

FME veitir fjórum fyrirtækjum innheimtuleyfi

Fjármála­eftirlitið hefur veitt fjórum fyrirtækjum innheimtuleyfi samkvæmt innheimtulögum. Þau eru Alskil, SPRON Factoring, Veita innheimtuþjónusta og Intrum á Íslandi.

Ráðherra íhugar lagasetningu um kynjakvóta

Jóhanna Sigurðar­dóttir félags- og tryggingamála­ráðherra hallast æ meir að notkun kynjakvóta til þess að uppfylla ákvæði stjórnar­skrárinnar um jafnan rétt kvenna og karla og vill skoða alvarlega setningu laga í því skyni.

Þorskkvótinn aukinn í 160 þúsund tonn

Sjávar­útvegs- og landbúnaðar­ráðherra hefur í dag gefið út reglugerð þar sem hámarksafli í þorski er aukinn um 30 þúsund tonn. Heildaraflamark verður því 160 þúsund tonn á yfirstandandi fiskveiðiári, í stað 130 þúsund tonna.

Flug­stjórinn hylltur sem hetja

Nær fjörutíu ára reynsla nýttist þegar Chesley B. Sullenberger, einnig kallaður Sully, nauðlenti Airbus 320 þotu US Airways á Hudson ánni eftir flugtak í New York í gærkvöld. Á hljóðupptöku úr flug­stjórnar­klefanum heyrist að flug­stjórinn hélt ró sinni og nauðlenti vélinni meistaralega við afar erfiðar aðstæður.

Kjararáð leggur það í hendur forseta að afsala sér hluta launa

Kjararáð hefur hafnað því að lækka laun Ólafs Ragnars Grímssonar, forseta Íslands. Í niðurstöðu þess felst hins vegar ekki afstaða til þess, hvort sá sem gegnir embættinu geti sjálfur afsalað sér hluta launa sinna, eða þeim öllum, tímabundið eða varanlega.

„Hot 4 Barack“ chilisósa

Borgaryfirvöld í Washington búa sig undir gríðarlega fólksmergð í borginni vegna innsetningar Baracks Obama, hins nýja forseta. Gert er ráð fyrir allt að fjórum milljónum gesta. Minjagripir tengdir Obama, jafnvel sósur, seljast gríðarvel. Það er Obama-æði.

Honda segir upp 3100 starfsmönnum

Japanski bílaframleiðandinn Honda hefur tilkynnt að 3100 starfsmönnum fyrirtækisins verði sagt upp störfum. Uppsagnirnar koma í kjölfar minni eftirspurnar. Við því bregst fyrirtækið með því að draga úr framleiðslu.

Karlaveldið lífsseigt

Skipting kynja meðal forstöðumanna ríkis­stofnana var í janúar 2007 þannig að af 210 forstöðumönnum voru 162 þeirra karlar (77%) en 48 konur(23%). Þetta kemur m.a. fram í skýrslu félags- og tryggingamála­ráðherra sem kynnt er á jafnréttisþingi sem hófst í morgun.

Mjög aukið aflaverðmæti

Aflaverðmæti íslenskra skipa nam 79,7 milljörðum króna á fyrstu tíu mánuðum ársins 2008 samanborið við 68,9 milljarða á sama tímabili árið 2007. Aflaverðmæti hefur aukist um 10,7 milljarða eða 15,6% á milli ára.

Gríðarlegt tap SonyEricsson

Tap sænsk-japanska farsímarisans SonyEricsson nam 261 milljón evra á síðasta fjórðungi liðins árs, eða um 44 milljörðum króna, sem er mun meira en búist hafði verið við. Velta var minni og færri farsímar seldust en árið áður.

Bank of America bjargað fyrir horn með 138 milljörðum dollara

Bank of America mun fá 20 milljarða dollara frá alríkinu og jafnvirði 118 milljarða dollara ábyrgðir vegna áhættusamra eigna. Með þessu er reynt að vinna upp fyrirsjáanlegt tap bankans vegna yfirtöku­nnar á Merrill Lynch.

Olíufélögin hækka verðið

N1 hækkaði í gær verð á bensíni um sex krónur og dísilolíu um fjórar krónur. Skeljungur hækkaði bensín um fjórar krónur. Olís hefur ekki hækkað verð þegar þetta er skrifað og er bensín lítrinn fjórum til sex krónum ódýrari þar en hjá N1 og Skeljungi.

Eimskip semur við skuldabréfa­eigendur

Eimskip hefur samið við eigendur 90% að virði skulda­bréfa í flokknum HFEIM081, útgefinn að verðmæti 1.610 milljóna króna. Forráðamenn félagsins vinna að því að ná samskonar samkomulagi við eigendur annarra skuldabréfa­flokka sem félagið hefur gefið út.

Asía réttir úr kútnum eftir lítilsháttar hækkun í Bandaríkjunum

Hluta­bréf í Asíu hækkuðu í verði í kjölfar veikingar á jeni og væntinga um að kínversk stjórnvöld muni grípa til frekari ráðstafana í efnahagsmálum. Helstu hluta­bréfavísitölur hækkuðu í Bandaríkjunum í gær, en gríðarleg lækkun varð að gengi hluta­bréfa í stærstu bönkum.

Þrír á slysa­deild eftir bruna á Klapparstíg

Þrír voru fluttir á slysa­deild vegna reykeitrunar, eftir að hús við Klapparstíg 17 í Reykjavík brann í nótt. Níu íbúar voru í húsinu. Allt tiltækt slökkvilið var kallað á vettvang og tókst að verja nærliggjandi hús, sem voru rýmd.