IS IT TRUE?

Á laugardaginn var mikill fjöldi fólks samankomminn í miðborginni til að njóta Listahátíðar í blíðskapar veðri. Fjölmenningarhátíð erlendra sem búa á Íslandi hófst með göngu niður Skólavörðustíginn. Skrautbúnar konur dönsuðu með bros á vör undir dillandi tónlist þeirra landa sem þær komu frá. Og ekki vantaði brosið á landann. Allir voru sjáanlega mjög ánægðir og fullir tilhlökkunar að taka þátt í viðburðum helgarinnar og ekki síst Eurovision keppninni.

Ísbirnir á Laugavegi

Gaman að sjá 2 uppstoppaða ísbirni fyrir framan verslun með minjagripi á Laugaveginum. Mjög vel til fallið sérstaklega fyrir ferðamennina sem stöldruðu við að skoða fyrirbærið og strjúka létt yfir feldinn. Góð hugmynd fyrir kaupmenn á Laugaveginum. Því ekki að gera Laugaveginn meira aðlaðandi og dálítið meira eins og útimarkað í góðu sumarveðri á laugardögum. Þarf ekki nauðsynlega að vera á hverjum laugardegi. Nýta sér góðviðrisdaga til þess arna.

Eurovision

Undirbúninginn fyrir Eurovision kvöldið sá maður strax í stórmarkaðnum. Þar hafði verið komið fyrir stöflum af snakki, ídýfum, gosi, nammi. Kjötborðið svignaði undan ýmsu girnilegu til að grilla. Landinn lætur ýmislegt eftir sér á Eurovision kvöldi. Þetta úrslitakvöld hefur víða orðið að reglubundinni samveru þar sem fjölskyldur koma saman og fylgjast með. Það er hið besta mál. Þakka ber RUV fyrir að halda keppninni áfram þrátt fyrir að „buddan“ á þeim bæ sé væntanlega rýr eins og hjá svo mörgum Íslendingum.

Gleðigjafinn Páll Óskar

Menn eins og Páll Óskar eru gleðigjafar. Slíka menn á að virkja til að gleðja þjóðina sérstaklega meðan hún gengur í gegnum sitt erfiða skeið. Páll Óskar hefur einstaka útgeislun og fær mann til að hlusta. Ósjálfrátt verður maður bara sæll með sig þegar hann er í sjónvarpinu. Og svo syngur maðurinn náttúrlega afbragðs vel Þarna er ljúflingur á ferð. Allir elska Palla. Ungir sem aldnir.

Hitt í mark

Og viti menn Ísland varð í 2.sæti í Eurovisoin keppninni. IS IT TRUE? Þessi fallega „ballaða“ sem Jóhanna Guðrún flutti frábærlega vel hitti í mark hjá flestum þjóðum Evrópu. Flutningur lagsins var einmitt svo ekta. Fágun og einlægni allra á sviðinu var með eindæmum, svo eftir var tekið. Ekki var verið að striplast og dansa um allt heldur var laginu, sem er afar ljúft, gerð frábær skil ekki eingöngu með söng Jóhönnu heldur, undirleikarar og bakraddir að senda skír skilaboð frá sér. Svona á að gera hlutina. Þau voru öll til mikils sóma. Perlur. Takk fyrir okkur.

Það var líka ánægjulegt að Noregur skildi hreppa fyrsta sætið. Athyglisvert að svo ungir listamenn sem Alexander og Jóhanna ná fyrstu sætunum og skila sínu með þvílíkum glæsibrag.

Útgeislun þeirra beggja og listsköpun hitti í mark og skaraði langt fram úr öðrum keppendum.

Menn hafa verið að „ grínast“ svolítið með vandamálið sem kæmi upp, ef við skyldum vinna í þessari keppni. Við ættum ekki nógu stórt húsnæði, og ýmislegt týnt til, ekki síst við þær aðstæður sem ríkja á Íslandi í dag. En það eru margir Íslendingar stórtækir dugnaðarforkar og takið nú eftir. Einn slíkur þekktur rafverktaki segist gefa með ánægju vinnu sína við að bjarga svona málum. Og taldi að svo yrði um marga í byggingabransanum, ef til kæmi. Það þarf vart að taka það fram að þessi ágæti maður er náttúrlega mikill Sjálfstæðismaður, maður sem býr yfir þeim krafti og dug sem einkennir einmitt Sjálfstæðismenn. Húrra fyrir svona Íslendingum.

Fleiri perlur

Á sunnudagskvöldið voru píanótónleikar Víkings Heiðars okkar unga snillings. Þar var enn ein Íslensk perla á ferðinni. Troðfullt var í Háskólabíói og mikil stemming. Að hlusta á tónlist er list út af fyrir sig. Og þegar flutningurinn er svo ekta sem hjá þessum hámenntaða snillingi sem bíður fram list sína af einlægni og lítillæti, fyllist maður þakklæti.

Rétta leiðin valin

Listahátíð í Reykjavík byrjar afar vel, allt hefur hjálpast að til að gera góða og vel skipulagða hátíð að stórhátíð, veðrið leikur við okkur. Hanna Birna Kristjánsdóttir, borgarstjórinn okkar, er að vinna sína vinnu á þann hátt að borgarbúar hljóta að vera ánægðir. Hönnu Birnu hefur tekist að halda vel utan um borgarmálin. Og takið eftir, þetta gerir hún hávaðalaust. Þarna er ekki verið að karpa og rífast um hlutina. Þeir eru unnir eins vel og hægt er. Borgarstjórinn

velur rétta leið. Nú er að standa saman og eyða ekki tímanum í þras heldur að

láta verkin tala.

Sumarkveðjur

Hanna Elíasdóttir