Össur hefur engan áhuga á Icesave - aðeins ESB skiptir máli

Minn gamli vinur, Össur Skarphéðinsson utanríkisráðherra er að villigötum og það því miður ekki í fyrsta skipti. Með pólitísku ofbeldi keypti Samfylkingin sannfæringu Steingríms Jóhanns Sigfússonar, og meirihluti Alþingis samþykkti að sækja um aðild að Evrópusambandinu, gegn meirihluta Íslendinga.

Eftir undarlegan klaufaskap tókst Össuri loks að koma aðildarumsókninni til skila og íslenskt stjórnkerfi var upptekið í marga mánuði að svara þúsundum spurninga frá hinu æðsta valdi í Brussel. Skiptir engu þó önnur og mikilvægari verkefni væru fyrir hendi. Öll áhersla hefur verið lögð á aðildarumsókn að Evrópusambandinu, með sérstakri blessun Steingríms Jóhanns Sigfússonar, sem lofaði kjósendum að berjast gegn aðild í síðustu kosningum.

Það á því ekki að koma neinum á óvart, eftir allt sem á undan er gengið, að hvorki Steingrímur Jóhann né Össur hafi sérstakan áhuga á því að nýta sér tækifærið sem nú hefur skapast, til að tryggja betur hagsmuni Íslands í Icesave-deilunni við Breta og Hollendinga.

Steingrímur Jóhann reynir hvað hann getur að sannfæra breskan og hollenskan almenning um að Icesave-samningarnir séu þeir bestu sem hægt sé að ná. Meirihluti Íslendinga sannfærist ekki.

Össur hefur mestar áhyggjur af því að deilan um Icesave komi í veg fyrir að Samfylkingin nái að koma Íslandi til „himnaríkis“. Þessa vegna ræðir Össur ekki við starfsbræður sína í ríkjum Evrópusambandsins um málstað Íslands heldur reynir að tryggja að deilan og synjun forsetans á Icesave-lögunum hafi ekki áhrif á umsóknina. Þetta kemur berlega í ljós í tilkynningu frá utanríkisráðuneytinu 9. janúar.

Össur hefur ekki áhyggjur af þeim byrgðum sem settar verða á Íslendinga vegna Icesave-samninga - nei þvert á móti. Áhyggjur utanríkisráðherra snúast aðeins um hvort synjun forsetans á Icesave-lögunum hafi áhrif á aðildarumsókn sem honum tókst við illan leik að afhenda. Þetta er í samræmi við ýmislegt sem birst hefur í erlendum fjölmiðlum, sem telja að staða Íslands í deilunni við Breta og Hollendinga sé vond þar sem þeir geti beitt neitunarvaldi gagnvart Íslandi þegar kemur að aðildarumsókn að Evrópusambandinu - bandalagi hinna heilögu.

Í frétt utanríkisráðuneytisins 9. janúar segir:

„Össur Skarphéðinsson, utanríkisráðherra, ræddi í morgun við Miguel Ángel Moratinos, utanríkisráðherra Spánar, sem er í forsæti ráðherraráðs Evrópusambandsins.

Í samtalinu við Moratinos skýrði utanríkisráðherra stöðuna á Íslandi eftir synjun forseta á Icesave-lögunum, gerði grein fyrir hagsmunum Íslands og að Ísland myndi standa við skuldbindingar sínar.

Í samtali þeirra sagði Moratinos að formennskan í ESB liti svo á að Icesave-málið og umsókn Íslands um aðild að ESB væru tvö aðskilin mál og að hin nýja staða sem upp væri komin á Íslandi myndi ekki hafa áhrif á meðferð ESB á umsókn Íslands.

Þetta er í samræmi við samtal utanríkisráðherra við David Miliband, utanríkisráðherra Bretlands, 7. janúar þar sem Miliband lýsti því yfir að Bretar myndu áfram styðja umsókn Íslands. Í samtali Jóhönnu Sigurðardóttur forsætisráðherra við Gordon Brown, forsætisráðherra Bretlands, kom hið sama fram. Þetta er einnig í samræmi við yfirlýsingar fyrra formennskuríkis ESB, Svíþjóðar, og yfirlýsingar framkvæmdastjórnar ESB.“

Af þessu er ljóst að utanríkisráðherra Íslands er ekki að halda fram sjónarmiðum okkar Íslendinga. Hann hefur mestar áhyggjur af því að umsókn að Evrópusambandinu, sem er gegn meirihluta landsmanna, verði beitt neitunarvaldi. Augljóst er að Össur Skarphéðinsson getur ekki og má ekki tala fyrir Íslands hönd á alþjóða vettvangi. Hagsmunir Íslendinga og utanríkisráðherra fara ekki saman. Það vekur því furðu að þrír forráðamenn samtaka atvinnulífsins skuli leggja það til að Össur Skarphéðinsson, veiti nýrri samninga- og sáttanefnd í Icesave-deilunni forystu. Þeir sem leggja slíkt til eru ekki í neinum tengslum við raunveruleikann. Það sýnir því miður að jafnvel forystumenn atvinnulífsins eru heillum horfnir.