Auknir skattar og álögur - skjaldborginni snúið gegn fólkinu

Fjárlög voru afgreidd frá Alþingi skömmu fyrir jól ásamt hliðarlögum til að tryggja hækkun á ýmsum sköttum og gjöldum. Svo ólíklega vildi til að annars hið málglaða Alþingi afgreiddi þessi frumvörp á mettíma án verulegra átaka. Þó er um mestu skattahækkanir í Íslandssögunni að ræða og meiningin að afgreiða fjárlög með 99 milljarða halla sem mun þýða það í raun þegar upp er staðið að hallinn verður yfir 100 milljarðar árið 2010.

Það er skelfilegt að afgreiða fjárlög með halla og óafsakanlegt þegar ástandið í þjóðarbúskapnum er eins og það er. Talað er um uggvænlega stöðu þjóðarbúsins vegna skuldasöfnunar. Er þá ekki ábyrgðarleysi að ætla sér að auka skuldir ríkisins um 100 milljarða á næsta ári.

Hvað svo með ábyrgðarleysið í sveitarfélögunum þar sem vart stendur steinn yfir steini í fleiri sveitarfélögum en færri.

Hvernig dettur stjórnendum ríkis eða sveitarfélaga í hug að það sé nú svigrúm til aukinnar skuldasöfnunar. Dettur einhverjum af þessum stjórnendum í hug að slíkt ábyrgðarleysi muni leiða til betri lánakjara eða auka líkur á að Ísland komist úr ruslflokki sem lántakandi.

Því miður þá verður ekki annað séð en stjórnendur landsins á þingi og í sveitarfélögum hafi gefist upp við að stjórna með ábyrgum hætti.

Ríkisstjórnin ber mesta ábyrgð á því að hafa ekki strax við valdatöku sína byrjað á að móta markvissar tillögur til að skera niður ríkisútgjöld. Þess í stað tíndi ríkisstjórnin eina og eina hugmynd upp úr hatti sínum þegar líða tók á veturinn og hætti síðan við sumar þeirra. Við slíkar aðstæður er erfitt fyrir stjórnarandstöðu að móta heildstæðar tillögur til niðurskurðar en samt sem áður ekki ómögulegt. Það er stjórnarandstöðuflokkunum hverjum og einum til verulegs vansa að hafa ekki lagt fram markvissar tillögur til niðurskurðar ríkisútgjalda, sérstaklega þeim sem hafa það á stefnuskrá sinni að draga úr ríkisútgjöldum.

Hvað þýðir þessi óheillastefna ríkis og sveitarfélaga? Hún þýðir það að hlutur hins opinbera vex og vex og mun sennilega ná allt að 60% af þjóðarframleiðslu á næsta ári. Sovét Ísland óskaland Steingríms J. Sigfússonar er þannig að læðast inn í landið með aðstoð allra stjórnmálaafla í landinu.

Hvar verður síðan svigrúm fyrir einkaframtakið í þessum viðjum ríkishyggjunnar? Samkvæmt fréttum þá verður það svo lítið að einyrkjarnir þurfa að gera sérstakar ráðstafanir til þess að standa þó uppi í nærbuxunum þegar líður á næsta ár. Af hverju voru þessi ólög og álögur ekki rædd með tilhlýðilegum hætti á Alþingi. Af hverju fór þessi óskapnaður í gegn nánast umræðu- og athugasemdalaust.

Skjaldborginni snúið gegn fólkinu

Skjaldborg er þeirrar náttúru að hún getur vikið sér í allar áttir. Þannig fóru Rómverjar að með sína hernaðarvél. Skjaldborgin fór þangað sem hershöfðinginn taldi best hverju sinni og barðist gegn þeim sem herstjórinn eða hundraðshöfðinginn vildi gera.

Skjaldborg Jóhönnu Sigurðardóttur um heimilin í landinu var með sama hætti og Rómverskri skjaldborg áður snúið gegn þeim sem hún sagðist hafa myndað skjaldborgina um.

Með þeim skattahækkunum ríkisins sem ákveðnar voru í jólavikunni færði ríkisstjórn Jóhönnu Sigurðardóttur fjármagnseigendum 15 milljarða á kostnað skuldugra fjölskyldna í landinu. Mikið af skattahækkununum leiða til þessarar hækkunar á vísitölunni. Þannig fá þeir sem eiga vísitölubundnar eignir 15 milljarða gjöf frá ríkisstjórninni þetta árið en með sama hætti tekur ríkisstjórnin 15 milljarða frá þeim sem skulda verðtryggðar skuldbindingar.

Hvað skyldi Bónus jólasveinninn forseti Alþýðusambands Íslands sem mælir með milljarða afskriftum á skuldum Bónus feðga segja við því? Ekki nokkurn skapaðan hlut.

Skyldi verkalýðshreyfingin mótmæla? Ég hef ekki orðið var við það. Er verkalýðshreyfingin virkilega orðin svo hræðilega viðskila við hagsmuni launafólks í landinu að hún telur eðlilegt og réttlætanlegt að skattahækkanir vegna séraðstæðna í þjóðfélaginu og ábyrgðarleysis stjórnmálamanna leiði til versnandi lífskjara skuldugasta fólksins í landinu? Fari verkalýðshreyfingin ekki í hatrammar aðgerðir gegn þessari kjaraskerðingu almennings í landinu þá er hún harla lítils virði.

Hækkanir verðtryggðra lána um 15 milljarða vegna skattahækkana sýna vel fram á hversu vitlaust verðtryggingakerfið er. Skattarnir hækka þannig að fólk hefur minna fyrir sig að leggja og þarf auk þess að borga hærri afborganir og vexti af lánunum sínum. Engum jafnvel ekki hatrömmustu einræðisherrum eða herstjórnum hafa látið sér detta í hug svona djöfullegt kerfi gegn hagsmunum almennings. Gegn hagsmunum vinnandi fólks gegn hagsmunum þeirra sem vilja fjárfesta og fylgja hugmyndafræði Bjarts í sumarhúsum að eiga sitt.

Það hefði átt að taka verðtrygginguna úr sambandi sama dag og neyðarlögin voru sett og það hefði á þeim sama tíma þurft að leiðrétta gengisbundnu lánin. Ég hef ítrekað haldið fram að hver dagur sem líður án þess að mótað sé eðlilegt lánakerfi sambærilegt því sem gerist í okkar heimshluta, á Norðurlöndunum, Bretlandi eða Þýskalandi og víðar sé glataður dagur í uppbyggingu þjóðfélagsins á grundvelli réttlætis.

Ríkisstjórnin hefur ekki myndað skjaldborg um heimilin í landinu. Verkalýðshreyfingin hefur ekki myndað skjaldborg um hagsmuni launafólks og sveitarfélögin hafa ekki myndað skjaldborg um hagsmuni borgara sinna. En sameiginlegt eiga þessir aðilar að hafa myndað skjaldborg um sjálfa sig og sína hagsmuni, sín fríðindi og sín laun. Þeir sem þannig fara fram eiga ekkert annað og betra skilið en stjórnendur gömlu Austur Evrópu ríkjanna og brýna nauðsyn ber til að velta þeim úr sessi.

Hin nýja stétt á Íslandi hefur ekki skynjað sinn vitjunartíma. Hún mun keyra þjóðfélagið í þrot verði ekki með góðu eða illu gripið fram fyrir hendurnar á þeim. Það má engan tíma missa.