Hvatning er nauðsynleg

Margir einstaklingar sem hafa sett svip sinn á mannkynsöguna og unnið stórvirki á hvaða sviði svo sem það kann að vera og hafa náð þeim hæðum af því að þeir fengu hvatningu og nutu trausts ástvina sinna eða vina. Stundum blæs ekki byrlega og allt virðist andstætt og þá skiptir máli að þeir sem standa fólki næst séu tilbúnir til að hjálpa til með hvatningu til að hver einstaklingur eigi þess kost að ná áttum og nýta sér hæfileika sína. Margir eiga sér drauma og langar til að gera hluti sem þeir komast ekki til að gera vegna þess að aðrir hlutir verða að hafa forgang. Dagleg störf og nauðsyn tekjuöflunar já og samkeppnin við náungann hamla því oft að fólk geri það sem það langar til.

Ef til vill þekkja ekki margir nafnið Nathaniel Hawthorne. Nathaniel missti vinnuna og algjörlega miður sín fór hann heim til sín til að segja konunni sinni frá því að hann væri atvinnulaus. Þegar Nathaniel kom heim og sagði við konuna sína „Ég get ekki neitt ég er aumingi sem var rekinn úr vinnunni“. Þá varð hann undrandi yfir því að konan hans tók því með fögnuði í stað þess að verða reið, ausa úr skálum reiði sinnar yfir hann og taka undir með honum að hann væri algjör mistök. Þess í stað faðmaði konan hans manninn sinn að sér og sagði „ Gott núna getur þú skrifað bókina sem þig hefur alltaf langað til að skrifa“. Já svaraði maðurinn en sjálfstraust hans var ekki mikið eftir það sem á undan hafði gengið og hann sagði; „En á hverju eigum við að lifa meðan ég er að skrifa bókina“? Nathaniel til undrunar dró konan hans út skúffu og tók þaðan umtalsverða fúlgu af peningum. „Hvaðan í ósköpunum fékkst þú þessa peninga“, sagði Nathaniel. Konan hans sagði. „Ég hef alltaf vitað að þú værir snillingur og ég vissi að einhvern tíma mundir þú skrifa meiri háttar bók. Þess vegna lagði ég til hliðar peninga í hverri viku með því að spara í innkaupum til heimilisins. Ég sparaði í hverri viku og nú eru hér nægir peningar fyrir okkur til að lifa af í heilt ár.“

Kona Nathaniel treysti honum og hafði mikla trú á hæfileikum hans og getu til að skrifa. Vegna þessa trausts og fyrirhyggju eiginkonu skáldsins gat hann látið drauminn rætast og skrifað bókina sem hann hafði dreymt um að skrifa. Bók sem er talin meðal bestu bóka sem skrifaðar hafa verið í Bandaríkjunum nafn bókarinnar er „The scarlet letter.“

Hvað hefði gerst hefði konan tekið á móti manni sínum með ásökunum. Hvað hefði gerst hefði hún ekki haft þá fyrirhyggju að leggja fjármuni til hliðar. Hún hafði trú á manninum og hún lagði peninga til hliðar af því að hún var sannfærð um að maðurinn hennar hefði hæfileika og það sem hann þyrfti væri tími frá brauðstritinu til að gera það sem hæfileikar hans stóðu til og láta drauminn rætast. Það gerðist síðan svo um munaði.

Þessi saga sýnir okkur m.a. hvað jákvæð hvatning skiptir miklu máli að. Að hafa trú á þeim sem standa okkur næstir og muna að allir eru sérstakir hver og einn. Enginn er einn. Hver og einn hefur sínar sérgáfur, sína hæfileika og það skiptir máli að við eigum þess kost hvert og eitt að fá að rækta jákvæða hæfileika og eðliskosti. Það er svo margt sem glepur og dregur úr okkur þannig að við nýtum ekki þá hæfileika sem við höfum. Við ættum á frítíma eins og þeim sem nú fer í hönd að huga að því. Eins og segir í 67. sögn Tómasar guðspjalls „Jesús sagði: “Sá sem þekkir allt, en skortir sjálfan sig. Skortir allt„. Í 111 sögn Tómasar Guðspjalls segir Jesús: “Heimurinn er einskis virði þeim sem hefur fundið sjálfan sig„.

Himnaríki er á jörðu

Ein helsta trúarhátíð kristins fólks fer í hönd. Helgi jólanna hefur raunar vikið fyrir glysi heimsins sem umlykur þessa trúarhátíð öðrum fremur. Ég vil óska ykkur öllum og fjölskyldum ykkar Gleðilegra jóla og minna á það sem Jesús segir í 113. sögn Tómasar Guðspjalls þegar hann segir: „Ríki föðurins er dreift um jörðina og mennirnir sjá það ekki“. Ef til vill er eftirfarandi góð áminning um þetta.

Trúðu á tvennt í heimi

tign sem æðsta ber

Guð í alheims geymi

Guð í sjálfum þér.