Fréttablaðið er Albanía Ögmundar í glímunni við Steingrím J.

Sigurður Bogi

Ögmundur Jónasson heilbrigðisráðherra.

Vinstri-grænir deila harkalega um afstöðuna til Icesave. Steingrímur J. Sigfússon, formaður þeirra, var í Kastljósi í síðustu viku og líkti sjálfum sér við píslarvott, hann yrði að taka á sig byrðar til að bjarga þjóðinni. Þessi raunarolla fór misjafnlega í fylgismenn vinstri-grænna en vakti mikla gleði innan Samfylkingarinnar, sem taldi Steingrím J. enn taka ómakið af Jóhönnu Sigurðardóttur.

Ögmundur Jónasson, heilbrigðisráðherra og mótvægi Steingríms J, meðal vinstri-grænna, ritar grein í Fréttablaðið 10. ágúst. Fyrirsögnin er: Uppgjöf Fréttablaðsins. Tilefnið er tvær greinar á leiðaraopnu blaðsins laugardaginn 8. ágúst. Ögmundur segir:

„Dauft var yfir leiðarasíðu Fréttablaðsins á laugardag. Uppgjafartónn í leiðara, og litlu betri var Þorsteinn Pálsson, fyrrverandi ritstjóri Fréttablaðsins, sem virðist helst sjá það aðfinnsluvert í íslenskum stjórnmálum að ríkisstjórnin skuli „sitja uppi“ með „andóf og tafleiki“ af hálfu nokkurra stjórnarþingmanna og ráðherra í Icesave-málinu. Þar er m.a. átt við undirritaðan.

Steinunn Stefánsdóttir kallar leiðara sinn „Það er búið sem búið er“. Þar er viðkvæðið svipað og hjá Þorsteini, búið sé að semja og síðan er því slegið fram að „hver dagur“ sé dýr sem líði án þess að gengið sé frá ríkisábyrgð á Icesave-samningnum….

Staðreyndin er sú að enn höfum við ekki gengist í ríkisábyrgðina þótt sumir hafi verið til þess albúnir að undirgangast hana án þess að gera minnstu tilraun til að kynna sér samninginn! Okkur ber skylda til að tryggja okkur eins vel og hægt er inn í framtíðina. Ef við leikum af okkur þá þurfum við að hafa styrk til að endurmeta stöðuna - svo lengi sem það er hægt….

Það getur orðið okkur dýrkeypt að búa við fjölmiðla sem hafa ekki hugrekki og staðfestu til að horfast í augu við vanda okkar og þora aldrei að endurmeta það sem gert er. Ég ætla að vona að menn gangi ekki til viðræðna við Evrópusambandið með þá uppgjöf í farteskinu sem birtist okkur í Fréttablaðinu sl. laugardag.“

Smáfuglunum er ljóst, að Ögmundur notar þau Steinunni, Þorstein og Fréttablaðið sem Albaníu í deilu sinni við Steingrím J. og Jóhönnu Sigurðardóttur um Icesave-málið.

Ögmundur kann vel aðferðina, sem Sovétmenn og Kínverjar beittu, þegar þeir deildu sem harðast á tíma kalda stríðsins. Þá réðust þeir á Albaníu eða vörðu hana, eftir að Enver Hoxha, einræðisherra Albaníu, gekk til liðs við Kínverja. Smáfuglarnir bíða nú eftir því, að Steingrímur J. eða málsvarar hans taki upp hanskann fyrir Steinunni, Þorstein og Fréttablaðið.

Síðasta efnisgreinin hjá Ögmundi er síðan bein árás á Samfylkinguna. Hún ætti að hljóða á þennan veg, enda semja fjölmiðlar ekki við aðrar þjóðir eða Evrópusambandið:

„Það getur orðið okkur dýrkeypt að búa við stjórnmálaflokka sem hafa ekki hugrekki og staðfestu til að horfast í augu við vanda okkar og þora aldrei að endurmeta það sem gert er. Ég ætla að vona að menn gangi ekki til viðræðna við Evrópusambandið með þá uppgjöf í farteskinu sem birtist okkur í stefnu Samfylkingarinnar.“