Áströlsk hönd gamla Kaupþings?

Smáfuglarnir hafa að undanförnu flogið í kjölfar Steve Cossers, Ástralans sem enginn hvorki þekkir né hefur heyrt um, og orðið þess vísari að hann sé samstarfsmaður helstu lykilmanna í gamla Kaupþingi og aðstoði þá nú við að kaupa helstu fjölmiðla á Íslandi.

Þegar smáfuglarnir spurðu farfuglana vini sína sem þekkja heimsins höf kom fátt í ljós um Cosser þennan annað en eitt smáfyrirtæki í Ástralíu. Hann er sagður vera fjárfestir sem fjárfesti í löndum sem starfa samkvæmt áætlunum Alþjóðagjaldeyrissjóðsins þó svo að enginn kannist við nokkur dæmi um slíkar fjárfestingar.

MBL

Cosser er ekki af smærri gerðinni og segist eiga 200 milljarða króna og hluta þess fjármagns vilji hann að festa á Íslandi. Hann hefur sagst vilja kaupa opinberar eignir auk þess að vilja kaupa bæði Morgunblaðið og Viðskiptablaðið.

Það er sama hvernig smáfuglarnir velta þessu fyrir sér þá eiga þeir erfitt með að skilja að maður sem sagður er eiga allt þetta fé ætli sér að kaupa gjaldþrota fjölmiðil í bullandi taprekstri á minnsta málsvæði heims og sé nú í öndunarvél hins opinbera. Þá sé enn furðulegra að ætla að gefa út dagblað á tungumáli sem eigandinn á engan möguleika á að skilja sjálfur.

Einu þekktu tengsl Cossers við Ísland er að hann var viðskiptavinur Singer & Friedlander, fyrrum dótturfélags gamla Kaupþings, og þekkir því Kaupþingsmenn vel enda voru það lykilmenn í gamla Kaupþingi sem fóru upphaflega með hann til Íslands og kynntu fyrir landi og þjóð.

Þá velta smáfuglarnir fyrir sér hvers vegna Kaupþingsmenn ættu að vilja eiga gjaldþrota fyrirtæki sem gefur út prentmiðil á Íslandi. Það hefur engum dulist hvernig Morgunblaðið hefur fjallað einna mest um samninga þeirra við erlenda prinsa, útrásarvíkinga og peninga í fjarlægum skattaparadísum. Þannig hafa smáfuglarnir það fyrir víst að um leið og Ástralinn hafi keypt Morgunblaðið muni áhugi hans á öðrum fjárfestingum á Íslandi hverfa með svipuðum hraða og dögg fyrir sólu í suðrænni skattaparadís.

Það skyldi þó ekki vera að senn gætu PR menn stjórnenda gamla Kaupþings sleppt því að senda fréttatilkynningar á fjölmiðla til að mótmæla fréttum. Þeir bæðu bara blaðið sitt um að sleppa þeim.