Hlutlausi fréttamaðurinn

Smáfuglarnir lesa grein eftir fréttamanninn Þorbjörn Þórðarson á Stöð 2 sem oft hefur átt ágæta spretti í fréttaflutningi sínum. Þannig tók hann til að mynda viðtal við sjálfan sig á meðan Davíð Oddsson gekk upp stigann í þjóðmenningarhúsinu á leið í vitnastúkuna.

Í greininni fjallar Þorbjörn um þá skoðun sína að Evran sé góður gjaldmiðill og telur að umræða um Evruna á Íslandi sé „óþroskuð“ vegna „mikil[la] áhrif bloggara, sem kynna sér ekki hlutina til hlítar“. Svo segir Þorbjörn „Umræðan á að snúast um staðreyndir og hagsmuni. Hvað sé best fyrir Ísland, en hún gerir það í flestum tilvikum ekki.“.

Facebook

Þorbjörn Þórðarson, ESB erindreki.

Nú hafa smáfuglarnir lesið margt um ESB og Evruna og hafa enn ekki rekist á pistil þar sem viðkomandi ræðir annað en hagsmuni Íslands í því samhengi. Kannski hefur Þorbjörn alfarið lesið pistla um eitthvað allt annað þar sem evran er nefnd, til dæmis í tískublöðum, en um það ætla smáfuglarnir þó ekki að dæma.

En hvert er inntakið í skrifum Þorbjarnar? Jú að þeir sem séu á móti Evrunni, og vilja ekki selja sig undir seðlaprentunarvald sterkustu ríkja Evrópu sem prenta peninga fyrir Grikkland, Portúgal, Írland og Spán eða hvern annan sem þarf á „björgunarpakka“ að halda, séu ekki „þroskaðir“ og hafi ekki „kynnt sér málin“ eða „þá miklu hagsmuni“ sem felist í málinu.

Sá sem varið hefur nokkrum mínútum í evru rannsóknir sér strax að hugmyndin er að sterku ríkin í ESB haldi þeim veikari á floti. Þannig munu þjóðverjar halda Grikklandi á floti og taka á sig þungan verðbólguskatt þegar seðlaprentvélarnar í Brussel bræða úr sér.

Þorbjörn segir einnig fullum fetum að það sé jákvætt að ríki sem lendi í áföllum séu „veik í nokkurn tíma“ þar sem atvinnuleysi fer upp úr öllu valdi með tilheyrandi óeirðum og vandamálum. Hér er alvarlegur misskilningur á ferð. Það sem gerist er að skiptakjör landsins við önnur ríki breytast sem kemur strax fram í gengi gjaldmiðla ef ríkin hefðu hvert sýna mynt. Þannig hækkar snarlega verðmæti útflutnings á meðan verð innflutnings hækkar. Þannig verða innlendar vörur álitlegri kostur og hámarksverð fæst fyrir útflutning. Slíkt gefur landinu í heild meðbyr til að takast á við vanda sinn. Atvinnuleysi ríkur ekki upp og höggið dreifist á allt landið. Það eru helstu kostir sjálfstæðrar myntar - þó ýmsir séu ókostirnir.

Smáfuglarnir velta þó einu fyrir sér. Hvenær gerðist það að fréttamenn, sem gefa sig út fyrir að fjalla hlutlaust um málin, fóru að skrifa áróðursgreinar í Fréttablaðið? Telur fréttastofan það vera við hæfi?