Evrópu­framganga Ingibjargar Sólrúnar sætir vaxandi gagnrýni sjálfstæðis­manna

Samfylkingin

Ingibjörg Sólrún Gísladóttir, utanríkisráðherra segir að heilmikil undirbúningsvinna sé hafin í utanríkisráðuneytinu fyrir inngöngu Íslands í ESB.

Innan Sjálfstæðisflokksins vekur Evrópuframganga Ingibjargar Sólrúnar Gísladóttur, utanríkisráðherra, sífellt meiri undrun. Ekki sé nóg með, að hún vilji setja sjálfstæðismönnum afarkosti heldur gefi hún nú til kynna, að undirbúningur að aðild að Evrópusambandinu sé kominn á fleygiferð innan utanríkisráðuneytisins, þvert á stefnu ríkisstjórnarinnar. Ingibjörg Sólrún blási ekki aðeins á gagnrýni innan eigin flokks um umboðsleysi í Evrópusambandsmálum heldur sjáist ekki fyrir innan ríkisstjórnar.

Nýjasta dæmið um einstefnu Ingibjarga Sólrúnar Gísladóttir birtist í hrokafullum viðbrögðum hennar við gagnrýni Stefáns Jóhanns Stefánssonar, varaborgarfulltrúa Samfylkingarinnar, á umboðsleysi hennar og annarra forystumanna flokksins, þegar þau boða aðild að Evrópusambandinu.

Ingibjörg Sólrún var spurð um þá skoðun Stefáns Jóhanns, að Samfylkingin væri ekki í stakk búinn til að styðja aðild að Evrópusambandinu ef hún ætlaði að virða sínar eigin lýðræðislegu samþykktir, í fréttatíma Stöðvar 2 á Þorláksmessu. Ingibjörg Sólrún svaraði á þennan veg:

„Ég er nú ekki sammála honum [Stefáni Jóhanni] því að það hefur verið mikil Evrópuumræða í flokknum árum saman raunar og fyrir síðustu kosningar þá var tekin heilmikil atrenna að þessum málum og m.a var vinnuhópur sem að vann í því að móta samningsmarkmiðin og í honum voru fjölmargir einstaklingar sem að hafa mikla þekkingu á málaflokknum.“

Athyglisvert er, að í þessu svari, tekur Ingibjörg Sólrún ekki af skarið um, hver sé stefna Samfylkingarinnar í Evrópumálum – að margir hafi talað um málið jafngildir því ekki, að því sé lokið. Raunar benti Stefán Jóhann á það í gagnrýni sinni, að vinnuhópurinn, sem Ingibjörg Sólrún nefnir, hafi aldrei lokið störfum. Það liggi alls ekki fyrir nein samningsmarkmið af hálfu Samfylkingarinnar.

Heimir Már Pétursson, fréttamaður á Stöð 2 og yfirlýstur samfylkingarmaður, tók viðtalið við Ingibjörgu Sólrúnu og hefur eftir henni, að „heimikil undirbúningsvinna“ sé í gangi undir hennar stjórn í utanríkisráðuneytinu, enda vilji áköfustu samfylkingarmennirnir „sækja um aðild að Evrópusambandinunu snemma á nýju ári.“ Telji Ingibjörg Sólrún, mikilvægt sé „að ferlið hefjist sem fyrst“ og á þá væntanlega við aðildarferlið. Vill hún „taka ákvörðun um þetta strax í febrúar á næsta ári og fara svo að vinna að málinu í framhaldinu.“

Heimir Már spurði Ingibjörgu Sólrúnu, hvort hún væri bjartsýn á, að hún fengi sjálfstæðismenn með sér í þessa Evrópuferð. Hún svaraði:

„Ég er já frekar bjartsýn á það. En auðvitað getur maður ekkert sagt um það fyrirfram. Ég þekki ekki svo innviðina í Sjálfstæðisflokknum að ég geti spáð fyrir um það. En ég er bjartsýn.“

Þá spurði Heimir Már, hvort Ingibjörg Sólrún vildi, að gengið yrði til þingkosninga í vor, ef sjálfstæðismenn fylgdu henni ekki, og svaraði hún: „Það gæti alveg farið svo já.“

Það kemur sjálfstæðismönnum í opna skjöldu að undirbúningsvinna vegna aðildar Íslands að Evrópusambandinu sé hafin í utanríkisráðuneytinu.

Smáfuglarnir segja, að þessi jólaboðskapur formanns Samfylkingarinnar hafi ekki vakið neina gleði meðal þingmanna Sjálfstæðisflokksins og þeim þyki í raun meira en nóg komið af þessu tali Ingibjargar Sólrúnar um stefnu og störf Sjálfstæðisflokksins. Hitt sé síðan hlálegt, að hún tali þannig ögrandi til samstarfsflokks í ríkisstjórn, án þess að hafa skýrt umboð í Evrópumálum innan síns eigin flokks.

Þá kemur sjálfstæðismönnum í opna skjöldu, að innan utanríkisráðuneytisins sé hafin „heilmikil undirbúningsvinna“ vegna aðildar Íslands að Evrópusambandinu, þvert á það, sem segi í stjórnarsáttmála ríkisstjórnarinnar. Orð Ingibjargar Sólrúnar stangist auk þess á við það, sem kom fram í máli Högna Kristjánssonar, yfirmanns Evrópuskrifstofu utanríkisráðuneytisins, á hádegisfundi sjálfstæðismanna um Evrópumál í Valhöll mánudaginn 22. desember. Högni hafi einmitt verið spurður um það á fundinum, hvort starfsmenn utanríkisráðuneytisins hefðu hafið undirbúning að aðild Íslands að Evrópusambandinu og sagt svo ekki vera.

Í ljósi þess, hvernig Ingibjörg Sólrún talar án nokkurs umboðs um Evrópusambandsaðild inn á við, hafa sjálfstæðismenn vaxandi áhyggjur af því, hvað hún segi um málið í samtölum við erlenda sendiherra eða utanríkisráðherra. Það gefi ekki rétta mynd af pólitískum umboði hennar innan eigin flokks eða ríkisstjórnar, ef hún láti eins og Ísland sé á fleygiferð inn í Evrópusambandið.

Tengt efni

• Fuglahvísl: Páll yfirbýður Ingibjörgu Sólrúnu
• Fuglahvísl: Ekkert Evrópu­umboð í Samfylkingunni