Óli Björn sterkur á Alþingi

Smáfuglarnir sjá að svo virðist sem Sjálfstæðisflokkurinn sé ekki dauður úr öllum æðum. Óli Björn Kárason hóf í morgun umræðu á Alþingi um fjárfestingar Framtakssjóðs Íslands og þá staðreynd að reglur voru þverbrotnar þegar Landsbankinn, ríkisbanki, seldi eignarhaldsfélagið Vestia til Framtakssjóðs Íslands.

Óli Björn Kárason, þingmaður Sjálfstæðisflokksins, tók í morgun slaginn um afskipti hins opinbera af atvinnulífinu.

Í reglum bankasýslu ríkisins, sem stofnuð var sérstaklega til að hafa eftirlit með viðskiptaháttum hinna opinberu banka, segir að selja þurfi fyrirtæki í opnu og gegnsæju söluferli. Ekkert slíkt átti við þegar ákveðið var á lokuðum fundi að selja Framtakssjóðnum þann fjölda félaga sem innan Vestia eru. Fyrir það gat Steingrímur J. Sigfússon ekki svarað og því ljóst að leyndarhyggja og brölt tíðkast enn hjá Alþýðubandalaginu.

Óla Birni fylgdu margir þingmenn að málum og var ánægjulegt að sjá t.d. Guðlaug Þór Þórðarson styðja þétt við bakið á Óla Birni í umræðum morgunsins. Umræðurnar minntu smáfuglanna á þann tíma þegar sjálfstæðismenn tóku slaginn og stóðu vörð um atvinnulífið og fólkið sem í því starfar.

Smáfuglarnir sjá að Óli Björn er af gamla skólanum og hikar ekki við að taka slaginn. Hann er einn fárra úr þingflokki Sjálfstæðisflokksins sem skammast sín ekki fyrir þá skoðun að atvinnulífið eigi að vera í höndum einstaklinganna en ekki hins opinbera.

Hitt er svo verra að hótanir Þorgerðar Katrínar um að snúa aftur á Alþingi hefðu þær afleiðingar að Óli Björn færi af þingi enda situr hann nú sem varamaður fyrir Þorgerði. Meðal sjálfstæðismanna er því vart trúað að Þorgerður muni fella Óla Björn út af þingi og taka þar sjálf sæti án þess að endurnýja umboð sitt meðal flokksmanna og í kosningum.