Pressan gleymir Þorgerði fyrir hrun

Pressan gerði fyrir stuttu, undir fomerkjum „Kaffistofunnar“, tilraun til þess að styðja við endurkomu Þorgerðar Katrínar á þing fyrir Sjálfstæðisflokkinn en skoðanakannanir hafa sýnt mikla andstöðu við endurkomuna og er um það rætt meðal sjálfstæðismanna að Þorgerður verði að sækja nýtt umboð í prófkjöri og svo kosningum áður en hún tekur sæti á þingi. Á Pressunni segir:

Það er ein af mörgum ástæðum fyrir því að Davíð Oddsson hugsar ekkert mjög hlýlega til hennar, svo vægt sé að orði kveðið. Þorgerður gagnrýndi líka Seðlabankann harkalega eftir hrun og vildi að Davíð yrði látinn taka pokann sinn. Geir Haarde þorði ekki einu sinni að hugsa um það, en Þorgerður Katrín sagði það. Nafn hennar er skrifað með gylltu letri í svörtu bókina í Hádegismóum.

Hvers vegna segir Pressan að Þorgerður hafi aðeins gagnrýnt Seðlabankann eftir hrunið? Hið sanna er þvert á móti. Þorgerður gerði harða sókn að Davíð Oddssyni þegar hann varaði ríkisstjórnina við því hvert stefndi en það gerði hann nokkrum sinnum áður en bankarnir fóru á hausinn. Ekki þýðir að setja Þorgerði í hóp með öðrum sem urðu fúlir út í Seðlabakann þegar allt fór á versta veg í bankakerfinu því Þorgerður var í ríkisstjórn og hlustaði á aðvaranir Davíðs. Hún skellti þar við skollaeyrum og viðhafði hrokafull gífuryrði. Þorgerður er sú sem byrgði ekki brunninn þó ítrekað hefði verið bent á nauðsyn þess.

ÞKG

Þorgerður Katrín Gunnarsdóttir og maður hennar sluppu undan 1.8 milljarða lánum sem þau fengu að færa í einkahlutafélag með sérstöku leyfi bankastjóra Kaupþings.

Þá vissi reyndar enginn um að Þorgerður og maður hennar hefðu 1,8 milljarða undir því að bankarnir færu ekki á hausinn og því vildi Þorgerður að haldið yrði áfram að dæla peningum í bankana fram í rauðann dauðann og mátti ekki til þess hugsa að Davíð hefði rétt fyrir sér - sem svo reyndist vera.

Pressan reynir að gera Þorgerði að þeim sem talaði af viti meðan Geir Haarde tók ekki á málum. Aftur fer Pressan rangt með. Þorgerður var þögul eftir bankahrun enda áttaði hún sig á því ásamt eiginmanni sínum að þau hefðu tapað 1.800 milljónum og að þau hefðu gert harða sókn að þeim sem varaði við. Þau fengu sérmeðferð hjá Kaupþingi þar sem bankastjóri o.fl. gáfu þeim sérstakt leyfi til að færa þessar skuldir í einkahlutafélag og því sluppu þau með öllu við það sem því fylgir að fá 1.800 milljónir að láni. Þau sluppu undan allri ábyrgð vegna klíkuskapar.

Þorgerður er þannig holdgervingur þess sem átti að losa sig við með „Nýju Íslandi“ og „breyttum tímum“. Ábyrgðaleysið og hrokinn sem mótmælendur vildu ekki áfram kemur heim og saman í Þorgerði. Hún hunsaði viðvaranir fyrir hrun og vildi kinda bálið áfram með fé almennings, hún fékk sérmeðferð í bankakerfinu enda þá ráðherra og nú eru þau hjón skuldlaus á meðan venjulegt fólk er keyrt í gjaldþrot.

Smáfuglarnir velta fyrir sér hvað Pressunni gangi til með þjónustu við Þorgerði Katrínu. Fyrir stuttu voru fjögur löng viðtöl birt við Þorgerði sem er einsdæmi í sögu Pressunnar og nú er nafnlaust unnið að endurkomu hennar í pólitík.