2/3 landsmanna vilja ekki Þorgerði Katrínu

Smáfuglarnir lesa í Viðskiptablaðinu að stór hluti landsmanna vilji ekki að Þorgerður Katrín snúi aftur á Alþingi. Samkvæmt könnun sem blaðið lét gera eru tæp 67% andvíg því að Þorgerður taki sæti á Alþingi. Í frétt VB segir:

ÞKG

2 af 3 landsmönnum vilja ekki að Þorgerður taki aftur sæti á Alþingi.

Í skýrslunni [rannsóknarnefndar Alþingis] var fjallað um stórar lántökur eiginmanns hennar sem starfaði sem framkvæmdastjóri hjá Kaupþing. Þá skapaðist í einnig í kjölfarið nokkur umræða um stöðu Þorgerðar Katrínar sem verið hafði ráðherra í ríkisstjórn í aðdraganda bankahrunsins.

Þorgerður Katrín hefur hins vegar áður lýst því yfir að hún hyggist taka aftur sæti á Alþingi þegar þingmannanefnd Alþingis skilar skýrslu sinni nú í september.

Tæplega 67% landsmanna eru hins vegar ósátt við þá ákvörðun samkvæmt könnun MMR. Tæplega 18% eru sátt við ákvörðun Þorgerðar Katrínar að snúa aftur en um 15% eru hvorki sátt né ósátt.

Á þessu má sjá að aðeins 18% eru fyllilega sáttir við að Þorgerður taki sæti á Alþingi og því 82% sem ýmist eru á móti eða taka ekki afstöðu.

Þorgerður Katrín hlýtur að taka mark á þessum niðurstöðum. Hún hefur áður sagt að lýðræðisleg niðurstaða skipti miklu máli og að hún taki mark á því sem almenningi finnst. Af þeim ástæðum tók hún sér hlé frá þingmennsku meðan mál hennar væri í farvegi þingsins. Að sama skapi hlýtur hún nú að hlusta á niðurstöðu könnunar VB og víkja af þingi og bíða þess að sækja nýtt umboð í næstu kosningum.

Smáfuglarnir horfa einnig til Bjarna Benediktssonar sem litla stjórn virðist hafa á þingflokki Sjálfstæðisflokksins. Mikil vinátta er á milli Bjarna og svo Þorgerðar Katrínar og Kristjáns Arasonar. Spennandi verður að sjá hvort Bjarni muni hunsa vilja landsfundar, kjósenda, flokksmanna og annnarra og styðja endurkomu Þorgerðar á Alþingi.

Hitt er svo einnig athyglisvert að maður Þorgerðar, Kristján Arason, var fyrir skömmu ráðinn til N1 sem er fyrirtæki í eigu fjölskyldu Bjarna Benediktssonar. Engu líkara en að Bjarni hafi tekið að sér að bjarga Þorgerði og Kristjáni.

Smáfuglarnir gera engar athugasemdir við að N1 vilji ráða til sín fyrrum yfirmann hjá Kaupþingi sem fékk allar ábyrgðir sínar á 1,8 milljarða lánum fluttar í einkahlutafélag ólíkt almenningi. Verra er að Bjarni ætli að styðja Þorgerði í að koma aftur eftir það sem á undan er gengið og skemma þannig fyrir Sjálfstæðisflokknum.

Bjarni má ekki gleyma því að Þorgerður var ráðherra í ríkisstjórn á meðan eiginmaður hennar hlaut sérmeðferð hjá Kaupþingi. Þorgerður úthrópaði m.a. Davíð Oddsson fyrir að vara ítrekað við því sem síðar varð.