Ómerkilegur Egill Helgason

Egill Helgason

Egill Helgason gerir á illræmdri bloggsíðu sinni árás á Kjartan Gunnarsson fyrrum framkvæmdastjóra Sjálfstæðisflokksins en Samband ungra sjálfstæðismanna veitti á dögunum InDefence svonefnd Frelsisverðlaun Kjartans Gunnarssonar fyrir að standa vörð um Ísland í Icesave málinu. Um verðlaunin segir Egill:

Veit einhver hvort InDefense eru búin að taka við Kjartans Gunnarssonar verðlaununum frá SUS – eða hvort samtökin ætla að þiggja verðlaun með þessu nafni?

Agli er svo svarað af InDefence í athugasemdum á síðunni þar sem segir:

Sæll Egill

Við tókum vissulega við verðlaununum og þökkum þá viðurkenningu sem í þeim felst, Það væri algerlega andstætt þeim samstarfsanda og hugsjón InDefence hópurinn byggir á að fara í manngreinarálit eftir stjórnmálaskoðunum. Við myndum jafn fúslega taka við verðlaunum frá Ungum jafnaðarmönnum ef því væri að skipta.

Það má vel vera að menn sjái ákveðna kaldhæðni í því að InDefence skuli veitt verðlaun kennd við stjórnarmann í Landsbankanum. Vilji menn velta sér upp úr því frekar en að ræða málefnið verður svo að vera.

Það má kannski spyrja í framhaldinu Egill, úr því þú ræðir nú reglulega um Icesave málið og hefur skoðanir á ýmsu varðandi málflutning InDefence: Hvers vegna hefur þú aldrei boðið InDefence hópnum í silfrið til að ræða málin? Það er kjörið tækifæri til að útskýra allt sem þú spyrð um og kommentar á hér á blogginu en hefur aldrei haft fyrir því að ræða við okkur beint um.

InDefence hittir þar naglann á höfuðið. Egill hefur aldrei boðið hópnum í þátt sinn sem kostaður er af skattgreiðendum og enn síður hefur hann reynt að gera grein fyrir sjónarmiðum þeirra sem eru á móti Icesave skuldum sem Steingrímur J. og Svavar Gestsson hafa þráast við að binda um háls íslenskra skattgreiðenda.

Egill skrifar einnig á síðu sína:

Kjartan var einn aðalmaðurinn í stjórn bankans sem steypti Íslandi í þessar hroðalegu skuldir. Að verðlaun sem veitt eru samtökum sem berjast gegn þessu skuldum skuli kennd við hann er vægast sagt súrrealískt.

Hvaða skoðun er það að Kjartan Gunnarsson beri ábyrgð á því að Icesave skuldir falli á íslenska skattgreiðendur? Kjartan hefur sagt að bankinn hafi aldrei talið svo vera og undir það hefur Seðlabankai Evrópu tekið, sjálft ESB og síðast en ekki síst fjármálaráðherra Hollands.

Þeir einu sem telja að erlendar Icesave skuldir Landsbankans eigi að falla á Íslendinga eru Steingrímur J. Sigfússon og Svavar Gestsson að ógleymdum Agli Helgasyni sem reynir ómerkilegt bragð í hatri sínu á Kjartani Gunnarssyni - að segja annað en það sem satt er.

Væri ekki rétt að losa hinn hlutdræga Egil úr starfi sínu og fá InDefence útsendingartímann? Sá hópur er ávalt málefnalegur og heiðarlegur í sínum málflutningi ólíkt umræðustjóra hins opinbera.