Stephensen dugnaðurinn

Sú nýjung er nú viðhöfð á Fréttablaðinu að ritstjóri fari sjálfur og taki viðtöl í blað sitt. Það kom því smáfuglunum skemmtilega á óvart að fyrsta slíka viðtalið í tíð Ólafs hafi verið viðtal við Sigurð Einarsson þar sem hann þvær af sér allar sakir og gerir harða sókn að íslenskum rannsóknaraðilum. Ef nöfnin í viðtalinu hefðu verið önnur hefðu smáfuglarnir talið að um endurbirtingu á viðtölum og fréttum Baugsmálsins hefði verið að ræða.

Ólafur Stephensen, ritstjóri Fréttablaðsins, gætir þess að Sigurður fái engar erfiðar spurningar.

Þeir eru ekki margir sem þekkja ekki Stephensen dugnaðinn sem gengur út á að skrifa hvað mest má um að Ísland eigi að afsala sér sjálfstæði og ganga inn í ESB, gæta þess vandlega að engar fréttir birtist um Jón Ásgeir og Ingibjörgu Pálmadóttur, og síðast en ekki síst taka viðtöl við útrásarvíkinga. Smáfuglarnir þakka fyrir að Ólafur fór sjálfur og tók viðtalið því ella hefði blaðmaðurinn sem fékk að fljóta með getað spurt Sigurð erfiðra spurninga eins og ungum blaðamönnum er tamt.

Hvar voru til dæmis spurningar um þau atriði sem fram koma í úrskurði Hæstaréttar í tengslum við gæsluvarðahaldsúrskurð Hreiðars Más? Fjölmiðlar hafa gert því skil og hefði ritstjórinn því leikandi getað spurt Sigurð út í þau atriði.

Smáfuglarnir sjá að vettlingatök Fréttablaðsins hafa ekkert breyst og blaðið er nú sem fyrr vinsæll vettvangur þeirra sem hvað mestu fé tapa fyrir hluthöfum sínum og telja svo að réttarríkið sé allt spillt og ónýtt um leið og það beinir sjónum sínum að þeim sjálfum.