Höfundar jafnréttisbókar: 5 konur og enginn karl

Menntamálaráðuneytið

Forsíða Kynungabókar

Smáfuglarnir fengu senda svonefnda Kynungabók sem menntamálaráðuneytið gaf út og er ætlað ungu fólki en í bókinni er farið yfir helstu kreddur femínista. Bókin boðar m.a. að jafnrétti skuli vera á öllum sviðum og aldrei megi gefa afslátt af þeirri kröfu. Það vakti því furðu smáfuglanna að sjá að sú regla virðist gilda um alla aðra en menntamálráðuneytið en höfundar bókarinnar eru fimm konur og enginn karl - 5 á móti 0.

Því til viðbótar var Hugleikur Dagsson fenginn til að myndskreyta bókina en hann er sá íslenski listamaður sem sýnt hefur konum og jafnréttisbaráttunni fádæma óvirðingu með teikningum sínum af grófum kynlífsathöfnum og öðrum ósóma. Ekki er þó vitað hvort sú staðreynd fékk höfunda Kynungabókar til að velja hann til myndskreytinganna.

Í bókinni er margt sem orkar tvímælis og engu líkara en að ritið sé ætlað til dreifingar á fundum femínista. Ætla smáfuglarnir því til sannindamerkis að nefna nokkur dæmi úr bókinni:

• "Talið er að rekja megi núverandi kynjamisrétti til þeirra tíma er eingöngu karlar úr valdastétt höfðu tækifæri til að móta samfélagið en það gerðu þeir út frá hagsmunum sínum."
• "Hvað einkennir þá nemendur sem eru fremstir í flokki í þínum bekk? Tengist það á einhvern hátt ráðandi hugmyndum um karlmennsku og kvenleika? Getur þú greint hvaða kynjahugmyndir eru ráðandi í skólaumhverfi þínu?"
• "Hefurðu skoðað skólablaðið þitt með kynja gleraugum? Hverjir veita skólablaðinu forgöngu? Hvers konar myndir og greinar birtast þar? Hefur þú tekið þátt í að móta efni blaðsins?"
• "Í fjölmiðlum virðast staðalmyndir kvenna og karla byggja á gömlum hugmyndum um hin hefðbundnu kynhlutverk. Þar eru birtingamyndirnar oft og tíðum einhæfar og íhaldssamar."
• "Rannsóknir benda til þess að á síðustu árum hafi markaðssetning og auglýsingar ýtt undir klám- og kynlífsvæðingu samfélagsins."

Hvernig ætli standi á því að hið opinbera standi að útgáfu áróðursrita þröngs hóp femínista? Ætli það sé markmið menntamálaráðuneytisins að fá alla nemendur í skólum til að skoða vini sína og skólablöðin með „kynjagleraugum“? Ætlar hið opinbera að nota skattfé til þess að planta fræjum neikvæðni og biturðar í skólum landsins með álíka útgáfu? Getur verið að bókin hvetji ung börn til þess að skoða bekkjarsystkini sín „út frá kynjahugmyndum“?

Hitt er svo jafnvel ótrúlegra og það eru upphafsorð bókarinnar en þar segir að „í ritinu [séu] hnitmiðaðar upplýsingar úr rannsóknum, gagnagrunnum, lögum og reglugerðum“. Mun það vera í fyrsta sinn sem sá rökstuðningur er lagður fram að eitthvað sé úr gagnagrunni og þar með hafi gildi í sjálfu sér. Með sömu rökum mætti gefa bók gildi af því að hún væri úr bókahillu.

Smáfuglarnir frábiðja sér að öfgafemínistar komist inn í grunn- og menntaskóla landsins með áróður sinn í ritum kostuðum af hinu opinbera. Hitt er svo sjálfstætt rannsóknarefni að athuga hvers vegna höfundar bókarinnar taka niður „kynjagleraugun“ á fundum ritnefndar en ætla öllum öðrum að nota gleraugun öllum stundum.