Heimdallur: Væri málið í reynd eitthvað öðruvísi ef móður­félagið væri frá aðildarríki ESB heldur en Kanada?

Smáfuglunum barst ályktun stjórnar Heimdallar, félags ungra sjálfstæðismanna í Reykjavík. Ályktunin skýtur föstum skotum að vinstristjórninni sem Heimdallur segir óstarfhæfa. Smáfuglarnir telja rétt að birta ályktunina í heild sinni.

Heimdallur, félag ungra sjálfstæðismanna í Reykjavík, gagnrýnir harðlega fórnarkostnaðinn við að halda óstarfhæfri ríkisstjórn gangandi. Til þess eins að halda friðinn á stjórnarheimilinu hefur ríkisstjórnin tekið upp þá yfirlýstu stefnu að bregða með öllum tiltækum leiðum fæti fyrir lögmæt kaup Magma á eignarhluta í HS Orku. Kaupin eru í samræmi við lög sem hafa að markmiði að skilja á milli eignarhalds á auðlindum annars vegar og dreifingu hins vegar. Skattgreiðendur á Reykjanesi eru betur settir að þurfa ekki að taka áhættuna af rekstri orkufyrirtækisins enda er árangur stjórnmálamanna í rekstri orkufyrirtækja langt frá því að vera glæsilegur. Þá má minna á að sterkir íslenskir fjárfestar fengust ekki til þess að kaupa hlutinn, þrátt fyrir ítrekaðar tilraunir stjórnvalda til þess að koma málinu í þann farveg.

Kaup hins erlenda félags á hlut í HS Orku er erlend fjárfesting sem er mikilvæg fyrir íslensku þjóðina um þessar mundir. Velta má fyrir sér hvað hafi orðið um hinar þungu áhyggjur af ímynd Íslands og möguleikum á erlendri fjárfestingu sem stjórnarliðar báru fyrir sig til að réttlæta samþykkt ríkisábyrgðar fyrir hinum vonda Icesave-samning sem fjármálaráðherra staðfesti í fyrra. Icesave-málið er óleyst en ríkisstjórnin hefur tekið að sér á eigin spýtur að bola erlendum fjárfestum úr landi.

Sjónarmið um að þjóðerni kaupandans skipti máli eru ekki málefnaleg. Spyrja má hvort ríkisstjórn sem kennir sig við norræna velferð treysti ekki félagi skráðu í Svíþjóð? Treystir ríkisstjórnin sem hefur tekið stefnu á Evrópusambandið ekki reglum Evrópuréttarins um heimilisfesti félaga og fyrirtækja? Væri málið í reynd eitthvað öðruvísi ef móðurfélagið væri frá aðildarríki Evrópusambandsins heldur en Kanada?

Heimdallur hvetur ríkisstjórnina til þess að halda betur á þessu máli og láta af tilraunum sínum til að gera út af við eðlileg viðskipti um eignarhlut í þessu fyrirtæki.

Smáfuglarnir taka undir skoðanir Heimdellinga. Andstaðan við kaup Magma eru fátt annað en þjóðernishyggja sem bitnar verst á þeim sem hún á að vernda - Íslendingum. Þeir sem efast um það geta horft til landa þar sem erlend fjárfesting er minnst í heiminum samkvæmt Alþjóðabankanum.

Í stuttu máli eru ríkustu þjóðir heims með mesta erlenda fjárfestingu og fátækustu þjóðir heims með minnsta. Það er gott að vita hvert vinstristjórnin stefnir.