Hvað á að kalla þá?

Ólafur Stephensen, ritstjóri Fréttablaðsins.

Baugspennarnir sem ganga þessa dagana erinda auðjöfranna og útrásarvíkinganna og skrifa nýjar Borgarnesræður gegn Davíð Oddssyni hafa í munni almennings hlotið ýmis heiti, eftir því sem smáfuglarnir hlera á kaffihúsum Reykjavíkur.

Ólafur Arnarson skrifar sem kunnugt samviskusamlega níð um Davíð í pistlum sínum á Pressunni á hverjum degi fyrir þá, sem greiða honum laun. Hann hefur hlotið nafnið Ólafur snillingur eftir að hann uppgötvaði að hverjum sem er stóðu til boða sams konar lán og forsvarsmenn eins bankans fengu úr sparisjóði einum úti á landi til að reisa sér sumarbústaði, tugmilljóna lán! Það þarf sannkallaðan snilling til að uppgötva þetta og óskandi að fleiri hefðu notið góðs af þeirri uppgötvun.

Ólafur Stephensen virðist hafa fengið sams konar heiti og forveri hans: Jón Ásgeir Stephensen, enda gætir hann þess vandlega að í Fréttablaðinu birtist lítið sem ekkert um alla þá furðulegu gerninga sem komist hefur upp um hjá Jóni Ásgeiri og þotuliði hans.

Bubbi Morthens er auðvitað kallaður Baugur Morthens eftir að hann (eða einhver í nafni hans) byrjaði að skrifa pistla á móti Davíð á Pressunni sem eru ekkert annað en bergmál af málflutningi annarra Baugspenna og Borgarnesræðumanna á liðnum árum.

Facebook

Einar Kárason

En spurningin er hvað á að kalla Einar Kárason sem hefur eins og Bubbi tekið að sér, væntanlega fyrir auðjöfrana og útrásarvíkingana, að kenna Davíð um hrunið en ekki þotu- og snekkjuliðinu með Jón Ásgeir í fararbroddi sem safnaði þúsund milljarða skuldum í bankakerfinu, rak skúffufyrirtæki, sem lánuðu hvert öðru á víxl og keyptu og seldu hlutabréf hvert í öðru, virtist eiga ávísanahefti á alla bankana og ekki þurfa að fara upp í Borgarnes til að hafa greiðan aðgang að stjórnmálamönnum, sérstaklega í Samfylkingunni (enda styrkti Baugur Samfylkinguna um tugmilljónir í aðdraganda bankahrunsins, eins og uppvíst varð).

Einn möguleiki væri að kalla hann Einar Garðar Hólm því að hann er eins og Garðar Hólm í Brekkukotsannáli í þjónustu peningavaldsins: Hann er til að hnýta slaufu á saltfiskinn, eins og Garðar Hólm. Og frá Einari heyra smáfuglarnir aðeins hinn óhreina tón, — eins og íbúar í Brekkukoti og annars staðar í hinum litla bæ í upphafi tuttugustu aldar heyrðu frá Garðari Hólm.