Sigmar Kastljós­stjóri snýst til varnar fyrir RÚV

Evrópuaðildarsinninn og sjálfstæðismaðurinn Guðbjörn Guðbjörnsson, sem stundum bloggar um nauðsyn þess að stofna nýjan flokk um skoðanir sínar, bloggar 9. mars um aðlögun stjórnsýslunnar að ESB-aðlögunarferlinu. Hann telur einnig, að RÚV hafi lagað sig að vinstri stjórninni. Guðbjörn segir:

„Það fer ekki á milli mála, að það eru nýir herrar komnir á Ríkisútvarpið. Það er búið að hreinsa til hvað starfsmenn varðar. Elín Hirst og fleiri, sem maður hefur haft grun um að hafi verið sjálfstæðismenn, eru búnir að fá pokann sinn og aðrir hafa verið ráðnir í þeirra stað. Lára Ómarsdóttir, mótmælaleikstjóri, er t.d. komin í stað föður hennar og byrjuð að predika svipaðan boðskap í morgunútvarpi á stöð 2. Draumalandið var í sjónvarpinu á sunnudagskvöldið og fyrir algjöra tilviljun kom í ljós í aðalfréttatíma sjónvarpsins í kvöld, að Norðurál borgar eitthvað minna fyrir rafmagnið en álver að meðaltali greiða í heiminum.“

Þessi skoðun Guðbjörns hafði ekki verið lengi á Eyjunni, þegar Sigmar Guðmundsson, Kastljósstjóri RÚV, kvaddi sér hljóðs með athugasemd og sagði:

Höfuðstöðvar Ríkisútvarpsins við Ofanleiti í Reykjavík.

„Þetta er fáránlegur pistill í alla staði. Á rúv er eitt stórt samsæri gegn sjáflstæðisflokknum þínum!!! Rökin þau að draumalandið var á dagskrá á sunnudaginn og í dag frétt um álverð. Ehhh, hefði þetta verið í lagi ef Draumlandið hefði verið á dagkrá í Janúar og fréttin um álverðið í apríl? Meira bullið. Draumalandið var dagskrársett fyrir mörgum mánuðum. Þetta er verðlaunamynd, unnin uppúr verðlaunabók og sómir sér vel í hvaða sjónvarpsdagskrá sem er – hvenær sem er. Fréttin um álverðið var fantagóð. Skúbb. Boðlega í hvaða fréttatíma sem er – hvenær sem er. Guðbjörn, þú getur betur en þetta.“

Smáfuglarnir vekja athygli á því, að Sigmar minnist ekki á uppsögn Elínar og predikanir Láru. Smáfuglunum þótti ekki mikið til Draumalandsins koma, að mestu samtíningur úr fréttum settur í áróðursbúning. Norðurálsfréttin var hins vegar greinilega einhliða áróðursfrétt í anda Kristins Hrafnssonar, þar sem leitað var álits Sigurðar Jóhannessonar, sem barðist gegn Kárahnjúkavirkjun og taldi hana og álverið á Reyðarfirði af hinu illa. Ekki nokkur tilraun var gerð í fréttinni til að kynna allar hliðar málsins. Smáfuglarnir telja ekki mikinn vanda að skúbba, ef ætlunin er að kynna aðeins hluta máls en segja ekki söguna alla. Afstaða Sigmars segir allt sem segja þarf um þau vinnubrögð, sem Guðbjörn gagnrýndi réttilega.