Furðuleg samsærissmíði Jóhanns Haukssonar

Jóhann Hauksson, fréttaskýrandi DV, er að mati smáfuglanna einn helsti samsærasmiður í þágu gamla Baugsveldisins. Hann hefur lagt sig mjög fram um að verja Icesave-afarkostina. Gömlu Baugspennarnir styðja þá allir, eins og sést hefur í leiðurum Fréttablaðsins. Afstaðan er mótuð til að lengja viðskiptalíf Bónusfeðga og fylgifiska þeirra. Árangur hennar birtist í „sátt“ Arion-banka við Jóhannes í Bónus – sátt, sem svipar í raun Icesave-samninganna og nýtur jafnmikillar virðingar og þeir hjá Samfylkingu og vinstri-grænum en óvildar alls þorra fólks, sem er nóg boðið.

Nýjasta dæmið um samsærasmíði Jóhanns Haukssonar er sú fullyrðing, að Gunnlaugur Erlendsson, lögfræðingur, sem starfar í Bretlandi sé „góðvinur“ Sigurðar Kára Kristjánssonar, aðstoðarmanns Bjarna Benediktssonar. Sigurður Kári kannast ekki við þetta og segir á vefsíðu sinni 8. febrúar:

„Á mínum langa ferli innan raða ungliðahreyfingar Sjálfstæðisflokksins hef ég ekki orðið var við að Gunnlaugur Erlendsson hafi verið þar virkur þátttakandi, þó Jóhann [Hauksson] haldi öðru fram. Raunar minnist ég þess ekki að hafa séð honum svo mikið sem bregða fyrir í störfum hreyfingarinnar.

Það er sjálfsagt að menn fjalli um og hafi skoðanir á reikningum sem breskar lögmannsstofur senda þeim aðilum sem þær vinna fyrir, en þeir hinir sömu ættu að temja sér að gera það með heiðarlegum hætti.

Þó Jóhann Hauksson og DV telji að tilgangurinn helgi meðalið þá verð ég að frábiðja mér að hann og DV bendli mig við reikningsgerð með þeim hætti sem gert er í blaði dagsins.

Sem aðstoðarmaður formanns stjórnarandstöðuflokks hef ég nákvæmlega ekkert með samningsgerð fyrir hönd Alþingis eða fjárlaganefndar að gera.“

Smáfuglarnir minna á, að Alþingi undir pólitískri forystu Guðbjarts Hannessonar, formanns fjárlaganefndar, stóð að samningum við bresku lögmannsstofuna Mishcon de Reya, sem hefur sent Alþingi og fjárlaganefnd þess 25 milljóna króna reikning fyrir ráðgjöf og önnur störf vegna Icesave-málsins.