Ungir sjálfstæðis­menn vilja taka upp dollar hér á landi

Nic McPhee

Stjórn SUS samþykkti í gærkvöldi ályktun um að íslensk stjórnvöld gangi tafarlaust til viðræðna við Alþjóðagjaldeyrissjóðinn um upptöku Bandaríkjadals sem lögeyris á Íslandi.

„Stjórn Sambands ungra sjálfstæðismanna hvetur til þess að nú þegar verði hafið samstarf við Alþjóðagjaldeyrissjóðinn um að taka upp Bandaríkjadal í viðskiptum á Íslandi. Ungir sjálfstæðismenn telja því miður einsýnt að tilraunir til þess að halda íslensku krónunni séu líklegar til þess að mistakast með miklum tilkostnaði fyrir íslenskt efnahagslíf,“ segir í ályktun SUS.

Þar segir síðan:

„Nýsamþykkt gjaldeyrishöft, sem meðal annars banna útflytjendum að kaupa krónur í erlendum bönkum til heimflutnings, undirstrika hversu vonlaus staðan er. Á meðan gengi gjaldmiðilsins fær ekki að ráðast á markaði munu stjórnvöld þurfa að grípa til sífellt harðari aðgerða til þess að verja gervigengið í Seðlabankanum. Þær aðgerðir fela annars vegar í sér höft og hins vegar fjárútlát.

Í ljósi fyrri reynslu Íslands sem og annarra þjóða af gjaldeyrishöftum gátu stjórnmálamenn sagt sjálfum sér að óumflýjanleg afleiðing þeirra er myndun tvöfalds gengis. Gengi íslensku krónunnar á Íslandi er of hátt skrifað, og erlendis er gengi hennar of lágt. Seðlabankinn niðurgreiðir þannig krónuna á íslenskum markaði. Mismunurinn sem myndast milli þessara tveggja, fölsku gengisskráninga er sóun.

Ungir sjálfstæðismenn skora á stjórnmálamenn allra flokka að láta lokið baráttu við vindmyllur. Annað hvort þarf að gefa viðskipti með krónuna frjáls og taka þeim afleiðingum sem það hefur í för með sér, eða að taka upp annan gjaldmiðil sem nýtur trausts í alþjóðlegum viðskiptum. Sú leið að taka upp annan gjaldmiðil er líklegri til árangurs heldur en áframhaldandi og síaukin höft í viðskiptum og stórkostleg fjárútlát Seðlabankans og ríkissjóðs.“