Ýmsir hagvísar í vikunni

Ed

Á föstudaginn mun Seðlabankinn birta tölur um krónumarkað og gjaldeyrismarkað í nóvember.

Eitthvað verður um birtingu innlendra hagvísa nú í vikunnim segir Greining Íslandsbanka. „Í dag birti Hagstofan tölur um vöruskipti við útlönd á tímabilinu janúar til október og á fimmtudaginn kemur birtir hún bráðabirgðatölur fyrir nóvembermánuð. Á miðvikudag mun Hagstofan svo birta tölur um innflytjendur og einstaklinga með erlenda bakgrunn á árinu 2009 og hagtíðindahefti um vísitölu byggingarkostnað fyrir árið 2009. Í heftinu er birtar töflur um breytingar á byggingarvísitölu síðustu 12 mánuði og fjallað er nokkuð ítarlega um breytingar á helstu undirliði hennar. Á árinu 2008 hækkaði vísitalan um 26,8%. Þar af hækkuðu hreinir efnisliðir um 47,9%, en sambærilegar 12 mánaða hækkanir efnisliða höfðu ekki mælst síðan á árunum 1989-1990. Hreinir launaliðir hækkuðu mun minna, eða sem nemur um 7,8%. Hækkanir á fyrirliggjandi ári hafa verið mun minni og hefur vísitalan einungis hækkað um 4,6%, þar af hafa vinnuliðir lækkað um 2,1% og efnisliðir hækkað um 4,5%.

Fjöldi erlendra gesta í nóvember

Á fimmtudaginn áætlar Ferðamálastofa að birta tölur um fjölda erlenda gesta í nóvember. Í október voru erlendir ferðamenn 7,5% færri en í sama mánuði árið 2008, en alls fóru ríflega 30 þúsund erlendir gestir frá landinu um Leifstöð nú í október samanborið við nær 33 þúsund í fyrra. Á hinn bóginn er breyting á milli ára óveruleg, en all hafa farið tæplega 426 þúsund erlendir gestir frá landi á fyrstu 10 mánuðum ársins sem er einungis um 0,1% færri en á sama tímabili fyrir ári. Samhliða þessum tölum birtir Ferðamálastofa einnig tölur um brottfarir Íslendinga erlendis. Ljóst er að versnandi efnahagur og kaupmáttarýrnun á erlendri grundu hefur haft þau áhrif á landinn hefur snardregið úr utanferðum, en frá áramótum hefur brottförum Íslendinga fækkað um heil 42%. Í október var hins vegar minnsti samdráttur í einum mánuði það sem af er ári og voru brottfarir Íslendinga 14,6% færri en í sama mánuði fyrir ári.

Í þessu sambandi má hér nefna að á föstudeginum mun Hagstofan birta tölur um gistinætur og gestakomur á hótelum í október. Þegar þessar tölur er skoðaðar má sjá að það eru ekki einungis utanferðir sem landinn sparar við sig heldur hefur hann einnig dregið verulega úr hótelgistingum. Þannig hafði gistinóttum Íslendinga fækkað um 12% á fyrstu níu mánuðum ársins frá sama tímabili fyrir ári en gistinóttum erlendra ríkisborgara hafði fjölgað um rúm 3% á sama tímabili.

Efnahagur Seðlabankans og raungengi krónunnar í nóvember

Á föstudaginn mun Seðlabankinn birta tölur um krónumarkað og gjaldeyrismarkað í nóvember, svo og stöðu efnahagsreiknings síns í nóvemberlok. Í lok október var skammtíma gjaldeyrisstaða nettó hjá Seðlabankanum tæpir 224 ma.kr. en gjaldeyrisforði brúttó var þó rétt ríflega tvöfalt meiri, eða sem nemur um 451 ma.kr.

Sama dag mun Seðlabankinn einnig birta raungengi krónunnar í nóvember. Í október síðastliðinn hækkaði raungengi krónunnar annan mánuðinn í röð frá fyrri mánuði, eða um 0,2% á mælikvarða hlutfallslegs verðlags. Á sama tíma hafði nafngengi krónunnar lækkað um 0,8% m.v. vísitölu meðalgengis en vísitala neysluverðs hér á landi hækkað um ríflega 1%. Skrifaðist því hækkun raungengis á vísitölu neysluverðs, þ.e. að verðbólgan hér á landi hafi verið umfram verðbólgu í helstu viðskiptalöndum.

Afkoma ríkissjóðs

Reikna má með að fjármálaráðuneytið komi til með að birta greiðsluupggjör ríkissjóðs fyrir fyrstu tíu mánuði ársins í vikunni. Þó er ekki vitað nákvæmlega þá dagsetningu sem hún kemur til með að liggja fyrir en við væntum þess að það verði síðar í vikunni. Allt frá ársbyrjun hefur innheimtan verið töluvert minni en reiknað var með í fjárlögum, en tekjustofnar ríkissjóðs hafa dregist verulega saman í kreppunni á sama tíma og kostnaður ríkissjóðs hefur aukist verulega. Gerir fjármálaráðuneytið ráð fyrir í nýjustu þjóðhagsspá sinni að tekjur ríkissjóðs sem hlutfall af landsframleiðslu ársins verði litlar í sögulegu samhengi sem er andstætt við spá þess um útgjöld ríkissjóðs. Þannig áætlar ráðuneytið að tekjur ríkissjóðs komi til með að nema um 28,2% af landsframleiðslu en útgjöld 45,4%,“ segir Greiningin enn fremur.